Contis argjentinis cence cjâf (1)

 

Si che duncje, o vin tornât a tira fûr chest banner di cualchi an fa. Cuissà cui che sal vise… Ma nuie pôre, us al visìn nô!

O vevin inmaneât un concors di contis curtissimis, che a vevin la carateristiche di no lâ “a cjâf”, ven a stâi di no vê dentri un pont fer e jessi, par tant, componudis di une frase sole. Po dopo, si sa, a son tantis lis manieris di scrivi une conte cence cjâf e il risultât, lu podês viodi achi, dulà che si puedin lei dutis lis contis cence cjâf rivadis.

Ben po… al è cuntune vore di plasê che us disìn che la idee des contis cence cjâf e je stade nuiemancul che une ispirazion didatiche par il cors anuâl di furlan avanzât dai arlêfs argjentis. Aromai, vuai se no ju vessin! E insome… daspò di vêi fat lei lis contis cence cjâf ancje a lôr, ur è stât dât come compit chel di scrivilis e al pâr che la classe si sedi stiçâte e divertude une vore.

Insome… ce che al è e nol è, che a àn ancje pensât di regalânus dutis lis lôr “contis cence cjâf” e noaltris cuntune vore di gust lis publichìn in Ostarie, adiriture in trê pontadis, stant che a son une vore.

Ve chi la prime, alore, dulà che o cjatais une biele schirie di contecurtârs e us visin subit che o vin corezût di pueste pôc par lassâ a lis contis la lôr spontaneitât e savôr… argjentin!

Ricuarts
O sai che tu tu vegnis a mi par lassâmi cjapâ la tô man e lâ insiemi viers i tiei ricuarts di me.

di Cristina Degli Uomini

Consei
“Fâti amì dal judiç… simpri al è bon vê un pâl dulà gratâsi.” e di alì indevant, in cheste tiere al è stât simpri compagn.

A taule
Daspò di lassâju bruntulâ al diseve a siei fîs: “Masse passûts” e lôr si visavin che nissun mangjà si doveve dispreseâ.

Realtâts
“Se tu âs businôr tes orelis al è cualchidun che ti pense, fiol”.
“Pensiti ancje che a puedin jessi entitâts dal altri mont che a vuelin fevelâti”, e zontave la vuaridore dal borc.
E il miedi mi vûl fâ crodi che al è nome un tampon di cere!

di Zorz Cesaratto

Gattopardo
La viele regjine e je muarte e cumò la gnove e parone tal celet, ma lis âfs operariis, sotanis e lavoradoris, a van indenant a sfadiâ tant che prime. Par lôr nol è cambiât nuie.

di Augusto Bornancin

Semenâ
La plovisine e nudrìs il mont come semencis di pâs daspô la vuere.

Amôr
Un lamp al à iluminât la gnot in chel paîs scûr, e al discuvierç la malinconie di un amôr che si è pierdût.

Marilenghe

Ricuarts e insiums di migrants a son nâfs che a puartin la marilenghe intai lôr cûrs.

di Verónica Moscufo

GPS
La sô vite e jere dome un GPS di no ubidî mai… torne calcole… torne calcole…

Ironie 1
Inoridide e discuvierç, biadelore, che il so destin al jere tes sôs propits mans.

Ironie 2
La sô storie e jere la ironie puartade al parossisim.

Ironie 3
La sovrane ironie de sô vite e jere chê, cuant e à scuvierzût il so puest in chest mont, e jere rivade la ore di lâ ta chel altri.

Ironie 4
Di bot e sclop i siei dîs si jerin convertîts intune cjadene di bruts siums cence dismot.

Gnove cence cjâf
Il pizighet di Percut al è muart di un colp intant che al faseve une mirie jenfri une bare.

Umans
Infinît incussient arogance: fuarce primordiâl de zoventût.

di Marcelo Del Mestre

1 coments On Contis argjentinis cence cjâf (1)

Leave a Reply to Anonim Cancel reply

This site uses Akismet to reduce spam. Learn how your comment data is processed.

Pît di pagjine dal sît