Bisest in Cort!

E dopo jessi tornâts in vore cu lis contis, la prossime setemane o tornìn ancje in cjar e vues (a proposit, o vin zontât un gnûf event inte sezion spetacui). E lus fasìn un pôc a la volte, cuntun event che al somee une presentazion di libri, ma cirarìn di meti dongje un pocje di Ostarie.

Si che, LUNIS AI 5 DI LUI, tor 7 sot sere, a UDIN, li dal curtîl di Palaç Mantiche, Walter Tomada al crodarà di vignî a intervistâ l’Ostîr Rafaêl Serafin e magari par metât dal timp ancje al cumbinarà, ma par chê altre metât cuissà… podarès jessi che cualchidun di Chei di Contecurte al fasi cualchi incursion… E no us reste che passâ par li, se o sês in zone, a viodi ce che al sucêt.

Il spetacul al colarà dentri de schirie di apontaments che si davuelzaran dulinc de Istât intune tabele une vore siore che si clame ART IN CORT e par cumò us lassìn ducj chei dal mês di Lui. Lunis l’apontament al à a ce fâ cul Premi San Simon e si fevelarà di BISEST, il libri dal Ostîr di un pâr di agns fa, che come che aromai a àn tacât a dî ducj, no dome al veve induvinade la pandemie, ma al veve dât ancje lis rispuestis par saltâ fûr.

Insome… se o vês voie di fâ une vogade intun 2084 plen di brutis robis e marum, e je la vuestre ocasion!

O pûr, se no us interesse cetant dal libri, passait istès che si pues cjatâ un biel pocje di Ostarie!

1 comments On Bisest in Cort!

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît