Dentri il cûr

Tignî dentri il cûr i biei ricuarts al è come sparagnâ cualchi franc par cuant che tu âs une bisugne: no simpri dut al vâ ben, se capite une malatie, bisugne rivâ sostentâsi par no dâ pês a di nissun.
A lis voltis però o vin bisugne ancje dal sostentament morâl, ch’al jude a lâ indenant. Chel al varès di jessî dentri di no, par dâ un jutori cun robis piçulis e grandis, che te normalitât dal vivi a capitin. Un copliment fat di une agne, un rap di ue puartât di un barbe di to pari e chel caco madûr ch’al tignive tes mans cul colôr di un biel soreli a mont.
Chest omenon al veve fat dôs gvueris, Afriche, Italie, po le ultime dal cuarante passade a dâ coragjo a ducj, cuntun cûr grant; al contave che se lui al jere rivât a superâ chês robis brutis ta chei puescj forescj, le varessin fate ancje lôr e chest i veve insegnât a volê ben e no a copâ. Ancje lis lacrimis di chei ch’a scugnivin partî tal forest, par vuadagnâsi la bocjade a varessin fat cressi e comprendi il dolôr par fâlu deventâ sostegn.
Se il to cûr al à tignût dentri i moments biei e par vistî  chei bruts, dut chest al devente un tesaur ch’al po’ fâ invidie ae BCE e no ti coventaran par lâ indenant ni bancjis, ni cjadreis. Tes mans tu âs une recipe e dal to jessi al nassarà alt e fuart un jufufui l’“evviva’’ furlan ch’al cricarà cualsiasi gnot scure, come chê che ch’o stin vivint cumò.

di Marisa Gregoris
#1088

1 coments On Dentri il cûr

  • Une robe je certe, le amicizie ,le stime, il rispiet,le agregazion tra le raze umane e jude a supera ostacui cun limitazions cuasit impusibilis.Une conte ben sentade sul moment che stin passant, compliments a Marisa. Lussian.

Leave a Reply to Anonim Cancel reply

This site uses Akismet to reduce spam. Learn how your comment data is processed.

Pît di pagjine dal sît