Caleidoscopi…

Beniamin al jere une di chês personis che no i plaseve ni cuistionâ ni sei cuistionât, za che al so parê dificilmentri si rivave a risultâts positîfs, anzit, si coreve il risi di colâ intune violence verbâl che e varès podût fruiâ la relazion. Par chest, devant di ciertis situazions, la sô politiche e jere chê di sintî i conseis che i davin cun bocje di ridi e la cjalade atente, ma une volte che la ramanzine e finive, Beniamin al leve indevant pe sô strade come se nol fos sucedût nuie.

Cun cheste forme di jessi, ducj lu tignivin come une persone trancuile e amabile, invezit, lôr no savevin che la procession, cun ducj i confenons displeâts, e leve cjaminant par dentri.
Beniamin al varès vût tante bisugne di une uldide empatiche e analitiche, cun cui podê discjariâ dut chel marum che al veve dentri.

Si ricuardave che sô mari i diseve: – tu simpri tu fasis ce che tu vuelis, jo no sai a cui che tu someis. – Di fat al leve indevant cence abadâ a lis sôs racomandazions e ai conseis dai altris. Par moments si sintive che al jere come un ecuilibrist cjaminant sore une cuarde flevare, i siei pas, ancje se cuasi simpri misurâts e cautelôs, ju faseve cui voi sierâts, robonis di no crodi, ma mighe par sei sigûr? Nancje dîlu, al jere par no viodi i pussibii ostacui, che in veretât, cuant che si presentavin, ju scjavalgjave simpri come che al cumbinave.

E cumò, cun lis aghis cuietadis dai agns, Beniamin, sentât sore il so passât, al meteve i voi in sfese, come volint viodi, a traviers de cane di un caleidoscopi, chei timps vieris, cumò sfrantumâts in tancj tocuts di veris di ducj i colôrs. Al pensave che mai al varès rivât a savê cemût che e sarès la sô vite ore presint se ur vês fat câs a ducj chei che i davin conseis, disintji che al jere pal so propri ben. Lui nol voleve savê nuie des lôr opinions, tant e tant, se i vês di lâi strucje, che al sedi dome pal so mût di viodi lis robis.

…al è bielzà un grumon di timp che nissun lu tontone, nissun i dâ conseis…. chei conseis che tant al veve dineât in passât.

Beniamin al pensave che forsit… vuê… cui sa mai.

di Galliano di Buenos Aires

#1091

 

1 coments On Caleidoscopi…

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît