Scoltecurte #1: Presons

Presons… O vivìn intune preson colorade, che dentri si va metint altris presons e no si inacuarzìn di tropis che ‘nt jerin bielzà ator di nô e tropis che o vin dentri. Ma savê di vêlis, cjalâ de barconete di daûr dai fiers inrusinîts, e je za une buine maniere di scjampâ vie, almancul cul pinsîr, e di scomençâ a meti adun un plan di evasion. Des presons si scjampê, e je la lôr nature, chê di lassânus scjampâ.

E alore pe prime puntade di Scoltecurte, une rubriche che o vin pensade par podê dâ vôs a lis storiis de nestre Osterie, a son saltadis fûr trê storiis, pescjadis di Chei de Ostarie tal nestri archivi grandonon, che a àn a ce viodi cu lis presons. O almencul, o vin cjatât chest colegament jenfri lis sieltis che o vin fatis.

La prime conte le à sielte la Coghe Fuguline, e le podês scoltâ achì sot. E à decidût di dâ vôs a une conte di Carli Pup publicade ai 30 di Setembar dal 2013 intitulade propite: La preson. E no covente che o vais a leile, ma us baste fracâ play e scoltâ la vôs di Serene che us lei la storie. Une conte curte di chês che nus plasìn a noaltris, perfetis propite parcè che a son curtis, che e dopre la tecniche dal ribaltament di pont di viste par regalânus prime riflessions, e daspò un fals solêf, che si sfante subit. Une buine ocasion par tornâ a lei, pardon… scoltâ, une storie viere, che si è pierdude te memorie ma che ancje cumò e à une vore ce dî.

La seconde conte e je chi par doi motîfs: numar 1, al è il premi par il CovidCurte Day dal 2020, che al proviodeve, par la conte vincidore, la leture a vôs di bande dal Ostîr des contis publicadis di li indevant. E la Sartore, vincidore de competizion, e à viodude publicade su la Osterie cheste conte ca, che e veve figurât une vore ben intal concors Vôs de Basse, La conte si clame Fueis, e e fevele ancje cheste di presons, cheste volte une vore plui reâls e normâls. La vite e pues deventâ cussì, cualchi volte cence un parcè. E une puarte simpri vierte par slungjâ une man fûr de preson al è il scrivi e il lei. Nol è sucedût te storie, lete dal nestri Ostîr.

E tierce e ultime storie di cheste prime pontade di Scoltecurte e je une cover. Tal sens, une conte innomenade che e je stade voltade par furlan, par tamesâ sedi la conte, sedi la marilenghe. La rubriche si clame Ecuméne, le à inventade il nestri Cramâr Pablo e al è propite lui che al à voltât il toc. La conte e je “The Sentry” (1954) e cuant che l’Ostîr al veve proponût cheste idee di Scoltecurte, al veve scometût subit che il Famei al varès sielzude cheste. E il Famei Checo Tam al à sielzude cheste. La conte e je une vore cognossude e presinte in dutil lis antologjiis di scuele: si clame La sentinella, di Fredric Brown, e e ven doprade par spiegâ la tecniche dal ribaltament, come inte prime conte. La preson, achì, e je la vuere, che nus mostre un soldât in vuaite, sierât dentri une preson che e je fisiche ma ancje mentâl, creade dai oms cuintri i oms. No si capìs cemût che a podedin esisti lis vueris, ma in di di vuê a son ancjemò une vore.

Insome… vonde scrivi, e je ore di Scoltâ: BUINE SCOLTE… CURTE!

1 coments On Scoltecurte #1: Presons

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît