L’esam…

– No, no! No puedin freâti! Ma tu âs di scoltâmi me. Pal esam di culture furlane tu as di studiâ su la enciclopedie Atlantica. E tu sês a puest! Ouh! O ai dit enciclopedie Atlantica! Mighe monadis! No podaran freâti.
– Ma jo ai pôre, pôre di no visâmi…
– Ti dîs di no. Ti dîs jo! Cu le Atlantica tu vâs sigûr! Baste dome che no tu ti lassis sfreolâ des domandis cul truc.
– Domandis cul truc? Ce domandis cul truc?
– Par esempli. Se ti domandin cuant che al è nassût Gjulio Savorgnan, tu ce rispuindistu?
– Beh, eco, cheste le sai: 1516.
– Eco, storloç. No vuelin savê cuant che al è nassût!
– Ma…
– E je une domande cul truc. A vuelin savê se tu viodis il truc.
– Ma ce truc, cual truc? Ce varessio di rispuindi?
– Al è nassût, sì, intal 1516, ma il cognon just al è Savergnan! E se ti domandin ce maniere che e si clame la place principâl di Udin, tu…
– Ancje cheste le sai: place de Libertât e prime place Contarena!
– Brocul! La place principâl di Udin si clame Place Principâl. E ce vevial non chel furlan che al è stât Governadôr de Bancje d’Italie?
– Ah, facil! Bonaldo Stringher.
– Ri-brocul! Al veve non Springher. E il poete furlan, chel de plovisine?
– Ehh, facilon! Pietro Zorutti.
– Sdavàs di un om! Si viôt che no tu le âs nancje vierte la enciclopedie Atlantica! Al veve non Zerutti! E ce aial scrit?
– Poben… tantis robis, par esempli i Strolics.
– Eh, velu che al cole inte vuate! Al à scrit i Strilies! E chel che al fondât la glotologjie taliane, chel glotolic?
– Graziadio Isaia Ascoli.
– Ah, ah, ah! Si aie mai sintût un che al si clami ‘Graziadio!?’ Graziadio sarà une preiere, non un non! Graziano, al veve Graziano! Ignorant! Cumò tu ripassis dut, cun me, su la Atlantica.

di Laurin Zuan Nardin
#1063