Gotis intal cîl

Dôs gotis cun restis di neri a riposin sul paviment di piastrelis. Lis cjadreis di stran a crustavin cuant che cualchidun dai oms al comedave la sentade. Il cîl al jere clâr e cence lune. Pieri al cjalave parsore sossedant.
– A mi par che chê stele propit parsore di nô e je plui vicin cumò che îr di sere.
– Nancje jo le vevi viodude cussì.
– E sarà gnove, une stele che e cole?
– O al sarà un satelit.
– Chei si cognossin, a si movin simpri compagn. Cheste e somee lâ e tornâ.
– La nâf di une invasion? – al dîs Gjiani cun voi vierts e scocolâts.
– Une invasion di aliens propit tal Friûl? A ti ti someie?
– Nome che e continuarès une tradizion da secui…
– E se al fos cussì – Pieri si volte cjalant Gjiani fis tai voi – lôr a dopraran la mascarute?
– No si pues savê, cuissà indulà che a àn il nâs e la bocje!
­­- Tu âs reson, al podarès jessi che il nâs al è dulà che nô o vin il cûl e al incontrari.
– Cumò mi visi de teorie antropomorfiche Pieri. Sarès a dî che la vite inteligjente si pense che si disvilupi avonde compagn: al covente  vê mans, cerviel, voi e vie indenant. Ven a stâi che a saressin pocjis diferencis di nô umans.
– E ce che al centrial? Dut câs a àn nâs e cûl come noaltris, nome di une altre bande. A son sfumaduris ancje te teorie antropomorfiche, o pensi.
– Nol e restât nuie di neri.. pecjât!
– E se al è che al finis il mont? Chê stele saressial dal agnul dal fûc e la tampieste.
– E al è parcè che somee di zi e vignî: a son flamis che si movin – al dîs Gjiani. E cuant che l´agnul al jentre te atmosfere si brusarà dut.
No stâ a dî monadis, lis nâfs che a colin te atmosfere a son chês che si brusin. L´agnul al à alis e al pues vignî jù biel planc cence brusâsi.
– Al convegni che e sedi la astronâf, miôr il mont concuistât che finît. Podarès jessi ancje la pussibilitât che nus puartin a cognossi il lôr planet.
Lis cjadreis an tornin a crustâ.
– A laressin a restâ uchì cence fâ nuie?
– E ce vuelistu fâ?
– Mi somee che il lusôr al è plui fuart a ogni moment.
– Bon, viodarìn. Jo o voi a polsâ. Se indoman al è mont continuin a pensâ cun altri neri.

di Zorz Cesaratto
#1064

1 coments On Gotis intal cîl

  • Zorz al à incuadrât une biele conte, indula e tocje un grun i sintiments di ducj, cuant le sere si alce il cjâf a un biel cîl stelât, e in automatic si domandisi, ma ce ajal di jessi mo lassu. Restin chês gotis di neri a gjavâ lûs a la stele…..E ancje chi si domandisi ” ma ce ajal di jessi po”. Lussian

Leave a Reply to Anonim Cancel reply

This site uses Akismet to reduce spam. Learn how your comment data is processed.

Pît di pagjine dal sît