Discorint par furlan –

Vuê si festegje la zornade de lenghe mari, e propite îr di sere il vuestri Ostîr al è stât ospit de Sociedad Friulana di Buenos Aires che ogni sabide e met adun une iniziative bielonone: discorint par furlan. Ven a stâi une maniere par fâ sintî a siei arlêfs a fevelâ par furlan, ancje se tancj a àn tacâs di zero, e dome di pôc a studiâ la marilenghe.

E insome… e je stade une esperience une vore biele e divertente e si à fevelât di tantis robis e no dome di libris e scriture, come che magari al jere programât tal imprin. E je stade une biele maniere par viodi e cognossi plui di cualchidun dai nestri ultins contecurtârs, come Lenart Gjavedon, Cecilia Liva, Cristina Degli Uomini, Zorz Cesaratto o pûr un contecurtâr di viere date come il nestri Eduart Baschera, che al è ancje chel che al à tirât i fîi de serade.

O vin scuviert cuale che e je la colonie furlane plui antighe de Argjentine (che no je, par un mês, Colonia Caroja) e o vin discuviert i tancj progjets che a àn metût adun là vie e ancje chei che a podaressin fâ. E soredut al è stât une vore biel sintî a fevelâ furlan cuntun acent argjentin. E cun di plui, e je stade ancje la ocasione par saludâ Carlos, il cusin argjentin dal Ostîr, che a disin che adiriture i somei un pôc ma no je vere. 😉

E o vin cognossût la mestre di Juan Musso, e cjalât i cartei par la Udinese comprendût chel cui argjentins al Stadio Friuli. O vin sintude la liste di peraulis no tant par la cuâl di Marcelo che al à scuviert di jessi un menebigui, tal sens bon de peraule (ma ancje un starloc, eh). E par lâ a mostrâ cemût cjatâ lis contis par fruts su la Osterie e je lade a finî che a àn discuviert che o vin ancje lis contis erotichis. E insome… e je stade pardabon une serade une vore partecipade e soredut divertente.

E dopo ce? Nuie… vait pûr a viodi, se a vês voie di recuperâ la serade, cualchi fruçon des dôs oris di conversacion di îr di sere che o cjatais achì sul fb de Sociedad: Discorint par furlan – Rafaêl Serafin

1 coments On Discorint par furlan –

Leave a Reply to Anonim Cancel reply

This site uses Akismet to reduce spam. Learn how your comment data is processed.

Pît di pagjine dal sît