Cjalçûts diferents

Kumada in chel dî nol saveve ce metisi a fâ. No si jere inacuart che ‘nt veve cunsumâts une sporte, intal ultin an, e plui la zornade dai cjalçuts diferents si svicinave e plui si cjatave in dificoltât. I vignive fûr il fum pai nâs e par lis orelis a fuarce di remenâ il çurviel par risolvi il fastidi.
Cjalçuts! I coventavin i cjalçuts un diferent di chel altri. Ma cemût fâ? Al veve cjalât tal scansel e ju veve contâts ancjemò une volte. Nuie! No jerin avonde. Al veve provât a sledrosâ cualchidun, par viodi se al veve un colôr avonde diferent, ma nol veve cumbinâts chei che i coventavin. E lis buteghis a jerin sieradis. Al veve provât a fâ il zîr dai siei amîs, Gjigjigjatul, Piceçaçoçus, F86h5k§ele e nie di fâ. Ducj i vevin rispuindût che ‘nt vevin a malepene par lôr. Nissun pâr di cjalçuts di podê prestâi. Ma nol podeve mica lâ ator cuntune percentuâl discolce!?!
NPense che ti pense, Kumada nol saveve cemût tirâ fûr altris pâr di cjalçuts. Par lui, l’alien cun 20000 pîts dal planete Cjamine, la Zornade Universâl dai Cjalçuts Diferents e jere simpri un biel probleme.
I tocjarà fâ come in chê volte che al jere restât cence.
Al tire fûr lis fuarpiis laser e tache a taiâsi i pîts discolçs.
Par un pâr di dîs, fintremai che no i tornin a cressi, al cjaminarà su lis mans!

di Rafaêl Serafini
#1065

 

Note 1: Il gjat te foto al è Cjalçut (par motîfs evidents), ven a stâi il gjat dai Piçui Aiutants di Contecurte
Note 2: Nissun Cjalçut al è stât ofindût par scrivi cheste conte

2 coments On Cjalçûts diferents

  • Un dì tirant dentri le robe che vevi mitût a suiâ, no cjatai un cjalçut, l’ indoman intun cjanton dal curtîl indulà use scjamasi il cjan, cjatai une defecazion cjanjne insacade cussi ben intal cjalçut , che a distance sameave robe purcine. Lussian

Leave a Reply to Anonim Cancel reply

This site uses Akismet to reduce spam. Learn how your comment data is processed.

Pît di pagjine dal sît