Un zûc particolâr

E jere scomençade la riunion inte vecje latarie, chê dongje de glesie. A jerin lis dôs, l’aiar al jere turbul, e no dome pal fum penç dai spagnolets, si sintive un sconvolziment dapardut, si podeve lei il sconciert in dutis lis musis: a savevin che al jere un incuintri di sot bancje, di sfrôs, pericolôs, riscjôs, ma dovût. Subit il plui grant al jere montât in scagn, no dome par jessi di etât maiôr, tant che al jere une buine gjaline. Bepi, nol fevelave masse biel ma al veve lis ideis justis. – Di un moment a chel altri a rivaran ae frazion confinant – al professe. – O sin in pericul, o vin di jentrâ in azion….-. Però, prin di completâ la frase, la fieste e jere za finude. Intun colp di man, si sintì tremâ il mont, lis puartis a colavin tant che une lavine, une dopo di chê altre., – A son za rivâts, o vin di partî incorint! –  al disè fûr. In chel moment di confusion ognidun al restave par so cont, Bepi al cognosseve masse ben il teren, stant che al jere nassût propri li. Al saveve che al scugnive traviersâ il cjamp cence lassâ olmis sul teren par no jessi cjaçât come un nemâl.
Graciis ae buine fortune, sul cricâ dal dì si cjatave tal sigûr, une stale clopadice i veve dât la salvece. Dome tal indoman al à savût ce fortune che al veve vût: i siei compagns, in fat, no vevin vût il so destin. Daspò di cualchi timp, la situazion e veve cambiât, la agjitazion si veve disfredâte e al jere stât cjamât a menâ la plume. Nere e jere la realtât in chei dîs par chê compagnie des monts, però, daurman si è metût a disposizion. Intun baticei al jere in mission, cheste volte intun puest par lui inesplorât, propri scognossût. Lu vevin inviât tal forest. Al jere passât un mês cence manovris, i solit moviments di patuliament, vuardiis cence un tîr nancje al bersai. Il timp al someave jessi il so unic nemì, un aversari mai frontât par un furlan che al à simpri alc di fâ, di sintîsi util, di lâ indenant e di no spietâ ce che al ven.
In chei dîs, culì, il timp si butave in ploie. Une gnot, intant che a polsavin, un ton lu veve disdurmidît. Però, in veretât al jere il fûc de artiliarie nemie, e intun bati di cee al scatà l´infier, e jere tacade une azion di atac di lamp de bande contrarie. Pocjis oris daspò al jere presonîr di vuere cuntune desene di compagns, lu vevin gafât intun bosc daprûf. La preson lu meteve incuiet, nol veve plui puest tal cjâf pai pinsîrs. Al veve pensât al passât tant che al avignî, il presint lu voleve cjavalcjâ.
Al veve za fat sîs mês di presonie e biel sclet al ven clamât a fâ un lavôr sfuarçât. Pe sô negazion al va a finî in cele di isolament par un mês. La vuere e jere jentrade intun impasse, no veve masse azion. La imobilitât in dutis lis dôs bandis e risultave discomude in chel cjamp di reclusion, a scugnivin vê il confront. Bepi, par vie dal so compuartament, al vignive considerât un referent de bande dai rapidôrs. Al jere bielzà decidût che al veve di scuintrâsi cuntun incaricât dal cjamp di ranc alt , e une gnot al ven clamât par une disfide particolâr. Stant che la strategjie e faseve part dal mût di jessi di ognidun, in chel puest, i scacs a vignivin ben considerâts. Cumò il combatiment al capitave intal cjamp a cuadrei. Bepe al faseve di cjan e di lôf cui tocs. La partide e fo stade grintose e a fuarce di comedons il furlan al à vignît fûr vincidôr. Cheste e je stade une partide particolâr: un zûc di taule al à metût adun doi nemîs che mês indaûr si baterin a muart. In ricognossiment pe vitorie, il militâr nemì al à lassât il zûc a Bepi, gno nono, chel che mal à tramandât.

di Lenart Gjavedon
#1058