Il gno pipinot di nêf

Cumò tu lu viodis cussì, intabarât cun siarpe, barete e carote, ma in veretât, il gno pipinot di nêf al è stât un grant viazadôr. In prin de sô storie al jere un pipinot di soreli, tu as capît ben, un pipinot di rais che al regalave lûs e calôr. Pablo al è nassût in Messico a Tijuana framieç di cactus, plantis di cafè e iguanas
Al jere une vore content di sei al mont, ma une brute zornade al è sucedût un fat che lu à une vore scjassât.
Il fat al è chest: la costruzion di un mûr par fermâ i migrants ch’a rivin da lis Honduras. Fameis disparniçadis, fruts metûts in ta lis chebis come lis gjalinis, dineant  lôr la infanzie.
Pablo nol podeve lassâ cori chês robis achì, lis injustiziis e i tuarts i fasevin dûl intal cûr, alore al à decidût di scjampâ vie di corse, ma te corse si è inacuart che un braç, chel plui dongje al cûr, nol mandave plui rais di soreli, al jere daûr a inglaçâsi.
Scjampât al è rivât in Afriche, indulà che i fruts a son dolçs e a àn bisugne di calôr.
Subite però al à scuviert che no vevin avonde aghe par ducj, e chê poce no si podeve bevi, tant pôc ancje di mangjâ. Si jere sistemât intun vilaç di pocjis capanis, dongje a une di chestis.
Une barache dulà che tu ridis e je miôr di un cjistiel dulà che tu vais a disevin ducj culì.
Une gnot al è rivât un burlaç cetant fuart, cun folcs e tons, che al à parât vie dut e al à fat dal vilaç une grande poce di aghe. Ducj a son scjampâts di corse e framieç di lôr al è ancje Pablo che si è bagnât une gjambe.
Sol cuant ceh al è rivât in Indie si è inacuart che la gjambe no funzionave plui, il soreli dentri di sè al jere daûr a distudâsi e ben planc al deventave un toc di glaç.
Ce biele la Indie! Un paîs une vore siôr di storie, culture e tradizions, ma culì la vite di fruts e fantats no je facile e ancjemò di mancul biele. Al mancje dut! Mangjâ, medisinis, libertât e sperance.
La vite inte bidonvilles no je legre, cence fognis, aghe e lûs, e je une vore maluseriose.
Peçots a suiâ di colôrs studâts, musis cragnosis, un soreli che al secje stradis di pantan.
Pablo chestis robis nol rive propit a parâlis jù, la vite, il soreli, il cîl a son par ducj compagns , parcè tantis diferencis inta la tiere? Nol reste nuie ce fâ, i tocje scjampâ inmò, par cjatâ un puest seren intal mont.
In ta la foghe, si rint cont che ancje chê altre gjambe no je plui cjalde, e je frede, lis giambis a si tachin intun unic toc di glaç.
Cun grancj salts e cul sôl braç di soreli, al è rivât in Italie, In Friûl, in particolâr in te Basse Furlane, plene di aghis, boscs e storiis, un puest maraveôs! Dut i pareve plui biel, achì la int e stave ben, e veve dut, bielis cjasis, bielis machinis e ducj e lavoravin. I fruts a jerin biei nets, ben vistûts, in salût e ben passûts. Prest a si è inacuart che però a jerin i plui triscj di ducj i puests, e lavin par stradis cun lis musarolis, no podevin stâ dongje e braçolâsi, e a vevin di stâ lontan dai nonos e dai parincj.
Insome, une vite une vore dificile e cence ligrie.
Ancje i pipinots dai fruts a vevin lis mascarutis, cussì e je lade che dal dolôr il cûr di Pablo al à fermât di bati, si è studât ancje l’ultin rai di soreli, fasint di lui un pipinot di nêf, il gno pipinot di nêf.

di Stefano Lombardi
#1048

1 comments On Il gno pipinot di nêf

Leave a Reply to Anonim Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît