Contecurte te Panarie!

Induvinait dulà che o sin lâts a fincjâsi?
Si sin butâts ta La Panarie!
Ma sì, propite come Lupo Manarie te sô prime aventure achì su Contecurte. Ma cheste volte no je une aventure di fantasie, parcè che noaltris de Ostarie si sin butâts pardabon dentri de Panarie.
Dal numar che o cjatais tes libreriis convignudis chest mês, te gloriose e storiche riviste furlane al sarà ancje un cjanton dediât a Contecurte, dulà che une introduzion dal Ostîr us presentarà une grampe di contis di podê tornâ a gjoldi su cjarte, par cui che magari no lis à brincadis sul sît o nol cognòs tant ben dut l’archivi de nestre Ostarie.

O sin une vore contents di cheste colaborazion e us disvelin cun cheste imagjin chi in bande che la prime conte che e vierç il nestri cjanton e je propite la conte di Lupo Manarie, cun tant di dissen dai Piçui Aiutants Ricart e Jacum.
Dopo no us spiin altri.
Dome che o vin gust di dâ il nestri contribût, framieç di tancj biei articui di culture, cuntun pocje di narative furlane curte, vûstu par tirâ fûr de cantine cualchi piçul tesaur che magari al è stât dismenteât e pôc gjoldût, vûstu per regalà, plui indenant, cualchi alc di inedit o particolâr.
O savin che il mont al è fat di bufulis che no si tocjin, e o sin convints che di sigure tancj che a seguissin Contecurte magari a san pôc e nuie de Panarie, e tancj che magari a lei la riviste no san che a esist Contecurte. Par l’Ostîr al à subite dite di sì e cun gust a la propueste dal diretôr Vittorio Zanon.

A son timps dûrs par la culture, e forsit ancjemò di plui par la culture che si sbroche doprant il formât de “riviste” che pûr cetant al à dât a la storie de culture furlane e de so leterature. Par chel o vin gust di condividi ancje l’invît che o metìn chi sot par cirî di tignî bot ancje di cheste bande e se us scjampe un franc, visaitsi che a imparâ robis e scuvierzi culture al è simpri un biel investiment (soredut cumò che dentri nus cjatais ancje nô:).
(Us inzornarìn su lis libreriis dulà che o podês cjatâ la riviste tai coments)

2 coments On Contecurte te Panarie!

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît