Bon Finiment!

O sin tes ultimis oris dal 2020, chest al è l’ultin articul dal an e a chi al è l’Ostîr in persone, che us scrîf, par dâ a ducj il Bon Finiment e par meti in polse par cualchi zornade la Ostarie, fasint cuatri cjacaris in libertât su chescj ultins dodìs mês di Osterie. Meteisi comuts, che no vin premure.

DI DULÀ SCOMENÇÂ?

Dal dîsi che sin rivâts a chest Ostîr ca, che o viodêts inte fotografie fate dal Famei su lis rivis di une muarte dal Stele, a Titian, li de Madone de Nêf. Un Ostîr ingrassât, scjavelât, smavît, che al plate i voi daûr dai ocjâi e al è vistût di neri, ma ancjemò ben pontâts i pît tes lidrîs scritis su la maiute e te acuile che e je su la mascarute. E dutcâs, un Ostîr che al ponte la voglade lontan. Podarès dî che lontan al è viers il 2021, che al scomence doman, ma mi pararès une cagade e no vuei colâ in cheste stupide idee umane di dividi il timp in agns che e je utile dome par processâ lis informazions e meti adun la nestre vite, ma plui di li no à valôr.  Si sverarìn doman e si darin il Bon Principi cui stes fastidis che o nin a durmî usgnot: cu la int che si inmale, che e mûr, che e vuarìs a fature, che e piert il lavôr, la voie di stâ dongje e volê ben, che no ûl la vacine, che e crôt a ogni bufule, che e à simpri pronte une tristerie in sachete, cu lis libertâts gjavadis, i dirits smenteâts e la sdavasserie, la ignorance, lis cjativeriis che a paronin simpri di plui e dapardut. Oh, sì, nol è dut che al va in vacje, chel po no, ma che la strade cjapade e sedi chê, al è dificil di dineâ. Par chest la voglade di chê fotografie mi va intun lontan che nol è tant intun cîl dal mont temporâl, ma ben intun lontan di robîs di fâ, ideis di meti inpins, alc di biel di meti dongje doman e parcè che al inten me, di storiiis di contâ. Contecurte, tal cheste idee di doman, e je al prin puest, e al è un progjet che o ai simpri intundût come un puest di Resistence. No tant pe leterature, o pe lenghe furlane, che a son dome il mieç che o doprìn, ma plui chê altri in chel concet calvinian di tignî di cont e salvâ lis robis bielis, che no son “Infier”, e che bisugne fâlis durâ il plui pussibil. Contecurte e je une di chestis robis. Ven a stâi che cheste e je la prime robe di dî. Che o sari chi, cun ducj chei de nestre clape, ancje doman.

NUMARS E CONTIS

Ce numars vino vût, dilunc di chescj ultins mês? Ben po… o vin publicade la conte numar 1000, fate di ducj, plui o mancul, che nus à contade il personaç di Lupo Manarie, che di sigure lu cjatarês inmò ator pe Ostarie e che nus insegne a cjapâ lis robis cun mancul serietât, plui fantasie e parcè di no, cuntun pôc di matucel che mâl nol fâs. E dopo vê tocjât il numar mil, cu lis contis, o sin rivâts ae numar 1055, par un totâl di 150 contis, 241005 caratars e 68994 peraulis. Une medie di 2273 caratars e 460 peraulis par conte. O vin vût 26 autôrs diferents e 2 contis coletivis. I plui prolifics, in bande dal Ostîr e dal Famei (passe 20 contis par om), a son stâts Marisa Gregoris, Laurin Zuan Nardin e Galliano di Buenos Aires. Il super comentadôr di chest an al è stât di gnûf Lussian di Varian, che guai a no vêlu. A proposit, se o vin pierdût par strade cualchi conte che nus vês mandât e no vin publicât, tornait a mandâle. Ogni tant, intune Ostarie, si piert alc e cuissà dulà che al va a finîle. E soredut, mandaitnus contis, che cussì o tachin a jemplâ il camarin. Ancje parcè che lu vin ben svuedât, chest an, publicant dutis lis storiis de buinegnot di Ivano Urli, e chês dai Contecurte Day vieris, che ancjemò no vevin metudis sù. Su la nestre pagjine Facebook o sin rivâts a 790 plasidôrs e forsit di cheste bande si podarès fâ ancje miôr, a stâi plui daûr. La nestre Liste di Contecurte, che e je stade la vere novitât dal 2020, e je rivade, plui o mancul, a 180 di lôr (e us visin une volte in plui che al è inmò cualchidun che no si è inacuart che lis mail a rivin te caselute “promozioni” o che inmò nol à fracât il leam di conferme par iscrivisi).

EVENTS E LETURIS

Si sa, o vin fat pocje robe, ma alc o vin fat. Di events dal vîf o sin lâts indevant cu la colaborazion cul Sportel pe Lenghe Furlane de Basse e il concors Vôs de Basse, e a chi podês cjatâ un struc dal spetaculut di leturis fat dilunc de premiazions. E propite in sierade dal an alc che al podeve jessi une presentazion la Lunari di Prissinins al è devantât il video “Cirint la Lune tal Stele“, che us invidin a lâ a viodi, se no altri par i biei puescj e la pâs che si cjate ator di chês bandis e par lis cjantis des ConFusione che o sintîs daûr. O vin fat il Contecurte Day 2020, lu vin clamât CovidCurte Day e si sin inventâts, in gracie de nestre super Sartore Informatiche (che lu à ancje vinçût), lis versions audio des Contis, di maniere che si podedin ancje scoltâ lis storiis. O vin metût adun ancje une pagjine cul storic di ducj i events di Contecurte, che no je inmò finide, ma e sarà tra lis primis novitâts a rivâ. O cjatarês dentri une vore di materiâl, fotografiis e libruts di scjamâ, ma no vin inmò finît e nus covente ancjemò un moment.

INIZIATIVIS E IDEIS

Il domini totât dal an al è stât “La Conte dal Mês” un regâl che o vin fat a ducj i iscrits te Liste ai 16 di ogni mês che al veve dentri:

  1. Une conte lungje inedite che o ai scrit suntun teme furlan di chel mês sielzût in cunvigne cu la Coghe.
  2. Un articul lunc de Coghe Fuguline, che al contave di tradizions furlanis
  3. Un dissen brut ma in teme fat pe cuvierte dal lavôr.
  4. Sorpresis di ogni sorte (contis, musiche, curts, zughets, lotarie, dissens dai Piçui Aiutants, ghost track no anunciadis… di dut!) metudis adun cun mateçs informatics e grafics de Sartore

O pues za dî – ancje cence consultâ la Coghe e la Sartore – che la esperience de Conte dal Mês no si ripetarâ tal 2021. Come che o ai za dite ai iscrits, al è stât biel, al è saltât fûr “un libri” che o crôt di buine cualitât, al è stât un diari dal an e de vite in Friûl dilunc chescj mês unics te storie de umanitât, ma al è stât ancje alc che nus à cjapât une vore di timp e creativitât. Viodarìn cemût movisi par podê magari dâ a chest lavôr une publicazion su cjarte, ma par il prossim an o pensarin a alc altri. E propit par chest, us invidi a iscrivisi ae Liste (basta viodi sul sît e meti dentri la vuestre mail) par ricevi ogni setemane i inzornaments de Ostarie.

Une altre iniziative e je stade chê des Lotariis, che o podês cjatâ tes diretis de pagjine Facebook. A proposit… la ultime e je stade doi dîs fa e ve chi i numars che a àn vinçût… Us mandarai la mail par visâus pene che o ai un moment. Cun di plui, al è di ridi, doi libris ju àn vinçûts propite la Coghe e la Sartore, ma ju vevin za, si che duncje, preparais voaltris cui numars di riserve che a àn za dit che ju cedin a cui che al ven dopo.

Simpri dilunc dai timps dulà che nus vevin sierât in cjase, o vevin tirade fûr ancje la idee di Scoltecurte, che no à vût masse adesions ma al è stât biel lei cualchi conte par telefon, a cualchidun. E dopo, o vin metût il piç ancje tal spetacul di Suns Friûl, che o ai presentât insiemi cu la Coghe, e un piç di Ostarie al è dentri di un pâr di sodisfazions personâls, come la vitorie tal Zâl par Furlan e la menzion tal Premi de Percude di Manzan (lavôrs metûts adun insieme cu la Coghe e Carli Pup).

COLABORAZIONS E JUTORIS

La colaborazion che o vin tacade plui di resint e je ancje la plui gruesse, in fat di contis. O vin un cjantonut inte riviste La Panarie, dulà che o puartarin su cjarte lis contis, magari pescjant alc di gnûf o alc di vieri ma smenteât. Comprait la riviste, se la cjatais, che dentri a son une vore di articui interessants (par talian) e altris piçulis bielis robutis par furlan.

O vin sostignût il Concors par Contis Curtis Vôs de Basse e anzit, al è pene jessût il bant par la edizion dal prossim an e jo, come simpri, o invidi ducj i contecurtârs a partecipâ, propit parcè che un concors al à valôr sedi pe cualitât, sedi pal numar di contis che a rivin, e se no i din la poie noaltris de Ostarie, no sai cui che al varès di fâlu.

E in ultin, o aidi ringraciâ chei che nus àn dât une man e nus àn sostignût cuant che o soi lât a domandâ premis pe nestre Lotarie, o visibilitât pes nestris iniziativis. Lu fâs invidantus a:

Altri e altris no mi ven tal cjâf e di sigure mi stoi disementeant cualchidun. Puartait pazience.

Bon. Al è dut, par chest an, e o profiti par dî che la Ostarie e restarâ in polse par lis primis dôs setemanis dal an. Us saludi a ducj di bande di ducj, Ostîr, Famei, Coghe, Sartore, Massarie, Piçui Aiutants, Berlon, Cramâr, Dorondon, il Cjantôr e il Poete. Bon Finiment e Bon Principi!

4 coments On Bon Finiment!

  • Bon an a dute le congrede di contecurte a sorestâ le ostarie, e compliments a le lôr determinazion di sburta simpri plui adalt il mani de nestre bandiere, e cussi ch’ al sedi, AUGURONS. Lussian

  • Ben, cjalant i numars e dutis lis iniziativis che a met impins Contecurte, mi somee just puartâ un ringraciament al Ostîr e a ducj i siei colaboradôrs. E je simpri une braure jessi (se pûr intal me piçul, une vore piçul) un contecurtâr!

    • Ma cjale, il ringraciament lu fâs jo a ti che tu sês un di chei che di simpri nus sostegnin cidin ma cocret. cence di te cheste ostarie e sarès diferente 🙂

Leave a Reply to L'Ostîr Cancel reply

This site uses Akismet to reduce spam. Learn how your comment data is processed.

Pît di pagjine dal sît