Contis de pandemie – Severin

A Severin cheste pandemie lu veve cjapât dentri di une smuarse çoncjantji progjets, ilusions e gnovis ideis che a varessin rignovît lis ativitâts che cun tante passion al puartave indevant di agnorums. Tra e fra Dicembar e Zenâr passâts, si forin sucedint dutis chês cunvignis, apontaments e salutazions, volint congjedâ l’an vecjo. Tra un bussul di plui e bielis frasis fatis metudis adun pe ocasion, si augurave che al rivàs un an diferent in cualitât a di chel che nus lassave, sperant intune anade plene di pâi di cucagne. Cundiplui, un numar come il 2020 dal sun armoniôs lu inmagave e che di sigûr i varès puartat cambiaments favorevui e fondamentâi te sô vite.

E i mudaments a vignirin. Severin al capive che al dipendeve di lui adatâsi, purtrop cualsisei cambi radicâl i gjenerave resistence. Par moments al balinave tra la onipotence, pensant che il risi lu vevin dome chei altris e in altris moments al viveve cun la paranoie de menace che lu atacàs chê maledete faliscje invisibil, che i blocave di pensâ cun razionalitât. Cence dâsi cont al rimandave di vuê a doman il jessî di cjase. – di sigûr lu fasarai, intant par vuê mi rangjarai cun chel co ai te credince – si diseve.

Severin al jere bielzà mentalmentri palomp come un cavalîr di sede tiessint la sô galete, si steve sierant dentri di une fuartece, dulà che la cjalade e steve in vuaite de insidie dal mâl, spietant che finalmentri une dì la nature lu varès trasformât in pavee lassantlu libar di svolâ.

Ma alc al veve di fâ, come tancj altris si svicinà a chei argagns virtuâi che al veve simpri dineât e che ju cjalave come robe dal diaul: – robe inventade par complicânus la vite, par tignînus a ments – al concludeve. Ma dai vuê, dai doman, al viodè che ben al valeve la pene di provâ.Se no cul timp al sarès restât isolât dal dut e di ducj. Nol podeve permetisi, nol jere te sô nature.

Cun tant di mascarine e ripristinantsi ogni tant, Severin si instradâ intun imprecîs percors, no savint dulà che al sarès sbarcjât. Salacor intune gnove dimension di vite, permetintji di tornâ aes ativitât di un timp…

… o salacor inniò.

di Galliano di Buenos Aires
#2045

1 coments On Contis de pandemie – Severin

  • Biele le conte di Galiano, smicjade ben sul timp corint, cun che incertece diaboliche che in ducj met adun chês trê peraulis “cui sà doman ” . Lussian

Leave a Reply to Anonim Cancel reply

This site uses Akismet to reduce spam. Learn how your comment data is processed.

Pît di pagjine dal sît