Cjavei di Sierade


Si intive simpri alc di pôc just, tal incjant che al à intor cualchidun.
Par solit al salte fûr di bot, cence inacuarzisi: i vistîts, lis cjaladis, i ategjaments, bocjis di ridi, il sorepinsîr… si tache intor e no tu jal tiris vie plui.
E alore ve li: la nape, i smursiei di miluç, i cjavei ros ferbints, spetenâts, e chê ande di jessi simpri pierdût dentris des sôs pivicjis.
E chel non po… Tarcisio.
Ma cui lu doprie Tarcisio, in dì di vuê?
E cemût si fasial, a inmagâsi di un Tarcisio?
Jê, po. Zoe, cun chel non maraveôs. Jê che cuant che e sbrisse vie parsore des gjambis sutilis, scjassant i siei cjavei di Sierade, e fâs sbatacolâ i voi di dut il coridôr. Lui, invezit, al è sudizionôs e i è restade dome sô mari, che dispès e je vie par lavôr parfin in dì di fieste. Al è stâ intune cjasute puare, dulà che i baraçs di rosis de strie si son mangjâts vie dut il prât. E al à i zugatui. Lis sôs colezions.
E Zoe e intone il pas al ritmi dal cûr e e digjeris paveis, intant che e forope i trois scûrs e e pense che cutuardìs agns a son avonde, par fâ l’amôr.
Tarcisio le invide in cjamare e je si inamore une altre volte.
Dai dinosaûrs cu lis lôr ruzadis di gome; dai peluches che a sclopin di fofositât; des pipinis che a spalanchin i voi scaturîts di sore la scansie plui in adalt; dai centenârs di pipinuts, o dal gjat neri fat cui legos, inmò di finî di fâ sù, poiât sul scritori.
«Voi a fâ di bevi intant che tu cjalis. Zuie pûr cun ce che tu vûs».
E Zoe e torne frutine, sclave de maravee.
E slungje i braçs par cjoli une pipine, more e smavide, cun voi di gjate. I tocje lis mans cicinosîs: gjavâle de scansie, vuicâ e fâle colâ al è dutun. Cjar! E je cjar! Cjar cjalde e fofe.
Une sierande di neri i cole devant dai voi intant che ju siere.

Ju torne a vierzi cjalant la stanzie di adalt. Une viele cui cjavei ros, in cogulute parsore de pipine rote, e sangloce vaint: la musute je sanganade e dal sipari dai lavris a cuchin i dintuts crevâts.
La femine si jeve sù, si volte, le cjale dret par dret in muse: uce che daurman si indolcìs. Zoe si piert a cjalâ dentri di chês pivicjis.
Une gnove pipine cui cjavei di Sierade, su la scansie, e spalanche i voi scaturîts.

di Rafaêl Serafin
#1034

3 coments On Cjavei di Sierade

Leave a Reply to Gianluca Franco Cancel reply

This site uses Akismet to reduce spam. Learn how your comment data is processed.

Pît di pagjine dal sît