Lupo Manarie e la invasion dai ors a Orsarie

Lupo Manarie al à di lâ a Orsarie intune farie a fâ comedâ la sô manarie ma o savês che Orsarie e je un potentât dai Ors e cussì ve che su la puarte dal paîs lui si cjate une sentinele ursine cuntune grande alabarde che i fâs: “Altolà chivalà, giri al largo, fermo o sparo!”
«Cui crodistu di jessi, sentinele, Goldrake? Tu âs une alabarde spaziâl…»
«Ce venstu a fâ tal stât libar di Orsarie?»
«O voi te farie di Berto Fari a fâmi comedâ la manarie…»
«No si puartin armis a Orsarie!»
«Ma la mê no funzione… o ai di fâme comedâ…»
E cussì al passe e al rive te farie di chel sgjavelon di Berto Fari, simpri cu la muse blancje e la bocje rosse pe bocjarie.
Berto al esamine la manarie cuntun stetoscopio e al dîs a Lupo Manarie… “Jo no soi la Cure adate… la manarie e à pierdût il fîl… tu âs di lâ di dai guos di Resie…”
A chel… la manarie, vint sintût che la prospetive e jere di fâsi uçâ malementri di chei cjochetons, e scjampe vie… tacant a saltâ sul mani e fasint sproing sproing sproing come tal fumet di Paperino…
I doi basoâi a cirin di cjapâle ma jê e travierse il paîs di Orsarie e e rive saltuçant sul puint di Levrons, cun desenis di Ors che i corin daûr menaçôs. Al è alarme gjenerâl!
Sì che, Lupo Manarie, che nol permetarès mai che i fasin dal mâl ae sô manarie, che se no ûl fâsi uçâ, e varà lis sôs resons, ce ti fasial? Al mole l’innomenât berli di Lupo Manarie, une ciulade galatiche che e clame dongje ducj i Lôfs di Lovarie, a dâi cuintri ai Ors di Orsarie.
«Cjape chê Manarie!»
«Lasse stâ chê Manarie!»
E intant che a son ancjemò là che a barufin, la manarie e torne cuiete là di Lupo e i doi a van cuiets a Resie, a mangjâ il poleç, che la manarie, ancje se no uçade, e rive istès a taçâ.

di Checo Tam
dissen dai Piçui Aiutants di Contecurte
#1021

2 coments On Lupo Manarie e la invasion dai ors a Orsarie

Lasse une rispueste a Stralunade Cancele rispueste

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît