Verderam

Cualchi miluçâr, un piruçâr, dôs vîts, un ulîf, un armelin, doi cjespârs. E po i rosârs, lis vuainis, i cudumars…
Covente butât verderame. Une pompe di 12 litris su la schene, cu la man çampe pompâ, cun chê drete direzi. Une pompe no je vonde, a coventin dôs. Alore, par no stâ a meti jù dut il gabion, o clami la femine, che e mi travasi dentri inte pompe il seglot cul preparât za prontât.
Ahi! Une sclipigade su la schene sudade! Orc, orp, di un, ust, ce ti trai…
Alt, fer li!
Un salt indaûr di mieç secul.
No soi jo l’om cu la pompe, jo o soi chel dal seglot. E no soi jo chel che al disgote fûr un ORC, ORP, DI UN, UST, CE TI TRAI E V.I. Al è l’om da la pompe.
La file di vîts e je lungje, no je vonde une pompe. Il gno compit al è di tignî messedât intal caratel, di tignî di voli il cjaval e di puartâi un seglot di verderame plen a l’om da la pompe, di travasâlu dentri cence che al vedi di tornâ fin li dal cjar a jemplâle.
Une peraule! L’om da la pompe nol è grant, ma chei cuatri centimetris che o ai di plui di lui no mi judin plui di tant.
La aghe e je frede e je aghe di poç, e il caratel di rôl al sa ce maniere fâ par tignî fresc ce che al à dentri.
Provait a cjapâ une sclipigande frescje, dôs o trê, su la schene e su lis spalis sudadis!
Cumò o sai che inte mê ereditât al jere comprindût ancje chel orc, orp, di un, ust, ce ti trai!
O vares vût di capîlu za fa 50 agns! Cumò, se o podès par da bon tornâ indaûr un marilamp, o varès une robe impuartante di dîi a chel om cu la pompe, i disares ‘Tate’, o volares podê dîi…’Tate….’

di Laurin Zuan Nardin
#1002

1 comment