Doi neris a fasin stâ ben la famee: predi e purcit

Un cuintrisens! E jere cheste la peraule miôr par descrivi Tavo, vecjut insopuartabil e rognôs che ogni biade sere al paronave i discors su lis bancjutis de ostarie.
«I neris jo no ju sopuarti! Ma propite no ju sopuarti!» e jere la frase che par solit, fra un catâr e un altri, e deve il via ai siei bruntulaments. Di li in poi, ogni cjativerie e jere buine pe categorie. Anzit… al rivave a mudâ la stesse categorie intune cjativerie.
E cussì, mo un mo chel altri, dut il paîs al jere stât piturât di chel colôr.

Cui che al lavorave mâl, come i neris, cui che al lavorave masse, come i neris, fintremai cui che al jere un dorondon, o un peteçon, o pucefadiis, o dordul, o masse furbo, o al steve dibant, o al jere çondar, o scjars… e simpri, par scugnî, ogni volte, ducj, come i neris!

E no stait a saltâmi sù cu la naine che o soi razist, al diseve porconant. A mi doi neris mi van plui che ben!
Un al è chel là jù insom – e al segnave bande dal cjampanili, cul so dedut scalembri – e chel altri al è il gno purcit tal cjôt, che al mangje dut ce che mi vanze e nol domande mai nuie. Lôr, al diseve, lôr a son doi neris che o sopuarti benissim, si che duncje, no soi razist!

E tu podevis ben lâ a disi, a Tavo, che se le ves vude cetant cui neris, nol varès di sigure dât ogni sere un ûf dûr al senegalês che al vendeve acendins e cjalçuts. (Ma se al à fam…) e nol varès dât doi euro al marochin tal parcament dal supermarcjât (Eh, ma se mi puarte la spese…) e nol varès nancje poiât un biel piç de sô pension al missionari che al jere tornât dal Brasîl (in Brasîl a son ancje blancs, eh), par no fevelâ dal vê insegnât i motos de briscule al afgan “richiedente asilo” (e ma mi deve un fastidi no rivâ mai a fâ il cuart par fâ un ragjo!). Insome… o vês capît.

Po dopo, une dì, dut chest cuintrisens sui doi neris al mudà intun lamp. Al fo cuant che Don Ciso, dopo un pâr di… neris (e… no, su chei o savìn che nol è razist nissun) lu visà che nancje Gjesù Crist, stant che Betlem nol è di sigure sot dal Comun di Tarvis, di piel nol veve di sei cetant clare.
No lu vessie mai dit!
Di chê dì, di neris che i levin ben a Tavo, al restà dome un. E no di sigure chel sot dal cjampanili!

di Rafaêl Serafin
#974