Cuant che il purcit al è gras, bisugne copâlu

A son tantis manieris par deventâ siôrs, cun plui o mancul faturis, ma la piês e je sigure chê di deventâ siôrs… sparagnant. E Gjelindo al veve sielzude propitê chê!
No che al fos tirât: cuant che al jere di spindi, al spindeve, ma al jere un di chei che te vite al veve vût simpri pocjis pretesis e pôc di domandâ; ven a stâi che un bon moment par spindi nol rivave mai.
Da rest, lui… a vore dì e gnot, tal timp che i vanzave al proviodeve di boscâ, par sparagnâ sul riscjaldament; di curâ l’ort, par sparagnâ su la spese al marcjât; di là ator pai cjamps a cjapâ sù jerbis e pomis salvadiis, par sparagnâ sul gustâ e la cene; a cirî la blave smenteade, par tirâ sù poleçs e razis, e sparagnâ su la becjarie. E po, mai un viaç, nancje chel di gnocis; mai in ostarie, che un tai si pues bevi a cjase di chel de sô vigne; mai un vistît che nol costàs il just; che tan al bastave che al fos comut; e ancje su la machine, un pandin dal ‘88 tignût come un pipin, al veve simpri sparagnât, doprantlu dome cuant che propite al scugnive. Dut câs mai. Insome, sparagne vuê, sparagne doman, la bancje lu clamave une dì sì e une dì ancje par domandaji ce fâ dai bêçs. Investire, finanziare, acquistare… po sigûr po! «Che a stedin alì», al diseve, «Vûstu mai un mâl di gnot». I fîs, che tal imprin, a pene lât in pension e restât vedul, a cirivin di stiçâlu a comprâsi alc, a fâ un viaç, o almancul a lâ in osterie ogni tant, dopo un pôc a si jerin stufâts, o plui che altri, a jerin vignûts a savê che al jere plui dongje ai sîs zeros, che ai cinc. Insome… Che a stedin alì, a pensavin in fuarce di dutis lis faturis che i viodevin simpri a fâ, dì e gnot, e che di sigure i vevin stracât il cûr.
Ma stant che la pension e jere buine e che i vanzave inmò plui timp, Gjelindo al spindeve inmò mancul, e i sîs zeros sul cont ju veve in curt cjapâts e lassâts indaûr. E cun di plui, a fuarcè di lavorâ cun calme, il bon Gjelindo al veve une salût di fantat. Ancje masse! A disevin i fîs, che a vevin tacât a cambiâ idee, passant dal Che a stedin alì, a un plui invelegnât, No podaran mica stâ alì par simpri…
E cussì a vevin decidût di fâlu gjoldi un pôc.
«Ti menìn a Gardaland, pai!» i vevin dite sigurantji che al jere dut gratis. Lu vevin metût daurman sul Raptor, une di chês gjostris che tu ti caghis in man prin ancjemò di partî, e a speravin in ben. O miôr, in mâl. L’om al jere smontât cun doi voi scocolâts tant che doi balons.
«Cjalait cui che ai cognossût!» ur veve dit tirant dongje une panole cui cjavêi colôr panole, «Si clame Tatjana. O sin deventâts amîs dilunc dal zîr su la gjostre! E à dit che mi compagne ancje su chês altris, se o ai pôre!»
E di li ju vevin pierdûts di viste, cence nancje podê telefonâi par cjatâlu, che lui, clare, al veve sparagnât ancje sul telefonut, fasint di mancul di comprâlu. Al jere tornât dongje une setemane dopo.
Dret de Ucraine, in machine. Une Ferrari ultin model lustre come la padiele di un muart di fan; ficjât intun vistît Armani, cuntun anel che al slusive e al pareve propit sei un diamant. Tatjana, in bande di lui, e jere biele come il soreli, e inmò di plui l’anel che e veve tal dêt.
Gjelindo, rispuindint intun colp a ogni domande che a vevin tal cjâf, ur veve dit ridint. «Si sin sposâts usgnot passade a Las Vegas! O rivin cumò devant dal aeropuart! O vevis propite reson, sparagnâ… al è dibant!»

di Rafaêl Serafin
#980