Cuant che in paîs e tacà a zirâ la vôs che Bepino al veve che incredibile abilitât, i siei amîs, vere o mancul che e fos la robe, a vevin tacât a insisti par puartâlu a sagre a Sant’Andree.
«Ma no ai voie! No mi plâs tocjâ la int!» al protestave dibant il puaret. Stant che sì, e jere veretât, i bastave dâi la man a cualchidun par savê intun baticei ducj i siei segrets: savê des bausiis contadis, se al jere maluseriôs, se al jere content, invidiôs, gjelôs, fastidiât… Insome, al jere par lui facil savê robis che chei no varessin pandût nancje sot torture; ma inte stesse maniere i costave une vore di fature. Al jere un fantat musan e suturni, Bepino, e propit nol sopuartave fâsi i fats di chê altre int.
Ma no jerin stâts sants, o miôr, al jere stât dome Sant’Andree, parcè che i amîs i vevin sigurât che nol varès vût di tocjâ nissune persone, vignint a sagre: al veve dome di tocjâ un purcit! Anzit, une scrove. Cul so contribût, i vevin dit, no podevin di sigure falâ.
E il puar Bepino, stant cussì lis robis, si veve impegnât. Al veve cjarinât plui voltis la bestie, une purcitone bocognone che e jere la atrazion de sagre, ma nie, nol rivave adore a scuvierzi nie. O miôr… spiete un lamp… al veve scuviert che la scrove e odeave ducj, in chel moment, e che e veve une gole insane di mangjâ i miluçs caramelâts de barache di front, e che e pensave che la nuvice e jere pardabon une vore, ma une vore brute; e insome… une vore di altris pensîrs, ma la informazion che i coventave ai siei amîs nuie, no i jere rivade.
Cussì al veve sbarât un numar a câs, dongje a chei che al veve sintût sielzi di altris. Nol podeve sigure dî che su chel aspiet nol veve nissun podê di indovin! Ma lis robis a jerin ladis come che a vevin di lâ e il trop di amîs nol vincè une biade fionde. Che trê cuintâi di scrove ju vincè nuiemancul che il nuviç, che cun di plui al veve zuiât un sôl biliet, butant un numar a câs. Altri che indovin, Beputi al fo coionât di ducj… al veve falât il pês dal purcit di plui di trente chilos!
di Rafaêl Serafin
#894
