A chei che nus corin daûr su Facebook lu vin za anticipât îr, ma cumò lu disin a ducj voaltris chi sul sît. L’esperiment dal CovidCurte Day 20, cu la leture a vôs des contis metude dongje dal test al è vignût une vore ben e Radio Onde Furlane e à decidût di fânus un biel regâl.
Cheste setemane, di lunis fin sabide, aes 12.00, subit dopo il Ce fâ, e aes 14,45, a vignaran trasmetudis lis contis dal CovidCurte Day 20, dôs in dì, si che duncje dilunc di cheste setemane lis podarês sintî dutis par radio. E mica dome une setemane? Setemane che e ven si repliche, juste a cavaloto des votazions.
Ma se o volês savê di plui, vuê aes 11.45, l’Ostîr e Lupo Manarie in persone us spiegaran dut, e o podês scoltâju sul solit 90.0 FM o in streaming in dut il mont dal sît di Onde Furlane, se il motopic al finis di lavorà. Ma se no rivais adore a scoltà la direte, nuie pôre… Vuê o o sin in vene di gnovis, us disìn ancje che no si sin limitâts a lâ in Radio, ma o vin metût sù lis contis ancje su Spotify!
Il tiermin par votâ lis contis par ducj chei che a son iscrits ae Liste di Contecurte al reste domenie ai 17 di Mai, e Lunis ai 18 aes 11.45, come vuê. l’Ostîr e Lupo Manarie a tornaràn in Radio a spiâ in anteprime galatiche universâl e lupomanariose cui che al è il vincidôr dal CovidCurte Day 20!
E se no sês iscrits ae Liste nuie pôre, o stais un lamp a iscrivisi, baste meti dentri non e direzion di puest tal spazi che o cjataìs sul sît e fracâ il link te mail che us rive. E dopo us rivaran lis istruzion vie pueste e ancje la conte dal mês. (e butait un cuc tal spam, che cualchidun al à inmò di confermâ, forsit par chel)
2 comments On CovidCurte Day su Radio Onde Furlane
Po pote, e ce lusso, cumo conteincurt, covidconte e vie ancjemò, a no à nie mancul che decidût di la a niçulasi disore i nûi cu lis ondis de radio onde furlane, pissigne e ce lusso, e ce sagre, e no ûs dîs trop che il nestri plasè di aventôrs de ostarie trop grant che al è. Lis nestris contis finalmentri disore i nui . Lussian.
Pingback: CovidCurte Day 20 – La Croniche | Contecurte ()