Cjançons che nus interessin

O vin un pâr di gnovis che nus tocjin di dongje e vuê, che al è vinars, e o vin cuasi finide cheste setemane dulà che si torne un pôc a vivi, o vin decidût di contâlis ancje chi sul sît, parcè che a son dôs bielis gnovis!

A son dôs gnovis che a fevelin di cjançons.

La prime e à a ce fâ cui nestris Piçui Aiutants di Contecurte, che come che o savês, nus judin simpri a dissegnâ par la Conte dal Mês e a chest pont, stant al lôr sucès, nus tocjarà assumiju ancje par altris lavôrs. Insome, Jacum e Ricart a àn dât il lôr contribût a un progjet metût adun di un coletîf di musiciscj furlans, par cjapâ sù un franc e podê comprâ un furgon pai malâts di distrofie muscolâr. Fracait achì su chest leam par dâ ancje voaltris un cotribût, se us va, ma cjalait e scoltait la cjançon, che si clame Fragile, e no si è smenteade dal furlan, cul rap di Tubet. Il toc al è une vore biel e al merete. Il progjet si clame “A fâ dal ben nol è mai mâl” e achi sul sît de UILDM

La seconde gnove, invezit, e à a cefâ cu la nestre Super Massarie de Osterie, Margarite Cogôi, che frescje di secont puest al CovidCurte Day 20, insiemi cu la sô metât artistiche, Marta Savorgnan (che un puest in Ostarie a podaressin ancje cjatâjal), e à pensât ben di scrivi une cjançon. Une cjançon che si clame La barcje, e che al è pardabon un biel toc. Se no cognossevis lis ConFusione, che plui di cualchi volte nus à dât une man tai spetacui, e je ore di scoltalis in cheste lôr cjançon, che e fevele di ducj nô, in di di vuê, e di cemût che o sin metûts e di dulà che o nin.

Insome… par vuê, scoltait e condivideit, che a son dôs cjançons e dôs iniziativis che a valin.

 

2 coments On Cjançons che nus interessin

  • Mandi a ducj! Ancje se un tic tart, par vie dal fat che nus pâr simpri di disturbà, Ricart, Jacum e jo vin gust di fâ i compliments al Duo ConFusione!!!! La lôr cjançon nus plâs une vore!!!!!
    Meretâ il titul di “Piçui Aiutants di Contecurte” l’è un grant regâl! O sin orgogliôs!!!!!!! GRASSIE!!!!
    ( Scusait se o cjatais falopis ma o ai di confessâ che par solit no scrîf in marilenghe😨)
    Mery

  • Grazie Mery, nus fas une vore plasé!
    Pal rest, nus samee che Ricart e Jacum a vedin plui che meretat il lor titul nobiliar! 😀

Scrîf un coment

This site uses Akismet to reduce spam. Learn how your comment data is processed.

Site Footer