Dome dôs robis a son buinis dopo muartis: avâr e purcit

Archimêt, si capive bielzà dal non, al jere un di chei che ur plâs studiâ, scuvierzi robis, tichignâ nozions, tamesâ misteris si no adiriture confermâ lis leçs universâls. Al gjoldeve, no jerin dubis, de chimiche e de fisiche, de matematiche o de architeture, ancje se di mestîr al faseve altri; ma nol refudave – e anzit, la cjapave une vore cun serietât – la sience aplicade al compuartament dai oms, tant di straviâsi in dimostrazions pardabon fûr cu la cassele.
Si jere metût tal cjâf, par contâus une, di dimostrâ o refudâ lis detulis e i proverbis. E jenfri di chescj esperiments che al veve fat, ducj in paîs si visin di chel dai doi Antonis.
Il prin Antonio al jere un vieli, so client. Insoportabil, rognôs, musan, gjenerôs dome di uce pai parincj e di chescj ricambiât, soredut par i cetancj bêçs che al veve, che ju rindeve ducj variûi, stant soredut a la pocje salût che al veve l’om.
Il secont Antonio invezit al jere un purcit. Un bocon purcit neri che il prin Antonio al tratave tant che un princip, viziantlu di matine fin sere.
Ogni biade dì, in funzion dal so studi, Archimêt al lave li di ducj i doi e al fevelave cun lôr.
Cul prin al discuteve dal testament, domandanji simpri se par câs al ves cambiade idee e al ves voie di fâ cualchi modifiche, o disponi di alc intant che al jere inmò vîf… ma nuie, il vecjo al jere il solit oribil personagjo.
Cun chel altri Antonio no che e sedi lade miôr: i fevelave e lu cjarinave sul pêl ruspiôs, ma la massime considerazion che la bestie i veve regalade e jere chê di une buiace slichignote e puçalente su lis scarpis gnovis.
Dai doi, in ogni câs, al murî prime il vecjo, che tal testament al veve lassât dit di no dâ ai parincj nancje la cuarte par picjâsi, rindint cun chel at, in pratiche, inutile par Archimêt la seconde part de dimostrazion de detule che al steve studiant. Il secont Antonio, par altri, propite te dì de muart dal paron, lu veve fat ridi di gust cun che sô stranissime rugnade, che e someave propite une ridade.
Si che duncj… al jere bon ancje di vîf, il purcit!

di Rafaêl Serafin
#959