Miercus di cinise

Marie za no jesseve de cjase, lis zornadis a jerin lungjis e grisis. Lis amiis no le visitavin plui. No si sintive strache e no rivave a durmî, al pareve che i siei ritmis a fossin cambiats. Cence premure, ma cence polse, fîs e nevôts a lerin pal mont, ognidun pe sô strade. Marie ju fo compagnant a ducj, mo vistude di corot, mo saludant i plui zovins, che a levin a vivi tes grandis citâts. E cussì la cjase si fo svuedant e la viele e restà di bessole. Une dì, un davoi in strade le alterà: Ca al passe alc, si disè, e judantsi cul baston e rivà fin ae puartele de cjase. Al pareve si fos scjadenât il montafin: ambulancis di une bande, sunôrs di sirenis di chê altre, infermîrs cu lis mascarutis, elicotars sore il cjâf, il cjar dai pompîrs a brene vierte, lis cjampanis sunant a martiel. Dai megafons, a Marie i rivavin des vôs che a disevin: «Siorute, che e jentri in cjase, siorute, che e jentri in cjase, o sin in cuarantene!» Chest batibui al sturnì cetant la biade viele che le fasè ricuardâ chei timps de vuere cuant che e jere piçule: «Mame, mame, a bombardin; mame, mame, si stan brusant lis fuiacis; mame, mame, cuant piturino i ûfs?» Une volte jentrade in cjase si sintì al sigûr e e tornà a dâ di ca: Ma di ce cuarantene mi fevelavino? Di sigûr che a àn volût dîmi Cuaresime.

Marie si ricuardà di un dai tancj Miercus di cinise. E scomençave la Cuaresime. Jê e spietave cun pazience di ricevi la cinise in Crôs tal cerneli. Di frute in sù no si jere mai pierdude cheste cerimonie, se no altri pensant, che daspò di cuarante dîs a saressin rivadis: Domenie Ulive, i preparatîfs dilunc la Setemane Sante, la scampagnade tal prât, il profum des fuiacis, i ûfs piturâts, lis scraçulis de joibe sante, lis marculis tes clevis di un cuel. Cence dismenteâ il Lunis di Pasche. Ce tancj ricuarts che e veve.