O sin ai 16!
E o sin rivât al mês di Avrîl.
Sì, sì, lu savìn, o sin ancje tal mieç di une pandemie, o sin stufs, o sin sierâts in cjase e o sin ancje une vore di altris robis, ma a noaltris de Osterie nus interesse che o sin rivâts ae zornade de conte dal mês!
Sêso pronts? Il contadôr, ca in bande, nus vise che a mancjin pocjis oris… e la Sartore e je daûr a meti adun i ultins magheçs sui file di podê scjamâ. E come simpri, par stiçâus, us lassi l’incipit de Conte dal mês e ancje un sbit di cuviertine dal dissen dal Ostîr.
E us spiin il titul de conte:
_______________
Tiere
La furmie e çatuce cence padin parsore dal vert. La fuee di pissecjan e à cjapât su la sô schene il pês di un dai flôrs, zalit e sglonf di soreli. A planc, si è pleade, lenzint un dai claps cuvierts di muscli che a cercenin l’altarut de Madone. In chel arc vivarôs di Vierte, un ragn al à intiessût la rêt e di cualchi bande, scuindût e atent, al sta in vuaite.
Rivade sul ôr, la besteute si ferme, e somee no vê nissun motîf par lâ indenant. Si volte e si torne a voltâ, in chel balinâ di scats e ripensaments che al è dome des furmiis, cuant che si sintin in preson. Come par tantis bestiis però, al pâr che il tornâ indaûr al sedi une pussibilitât no contemplade, e cussì tu le viodis di gnûf a lâ viers la tele. Une çate, dôs, e vele li, a niçulâ il so jet di muart, intun remenâsi che aromai al è il so destin. La umanitât, in dì di vuê, cundut di ce che al sta sucedint, no ise forsit cheste furmie?
________________
Se o vês voie che usgnot la conte e l’articul de coghe us rivin drets te pueste eletroniche, iscriveisi a la Liste di Contecurte!
2 comments On La Conte dal Mês di Avrîl
E ancjemò il nestri ustîr inte conte di avrîl, nus vierç lis pagjinis pierdudis di un mont lontan, indulà chei di une certe ete si ricjatin frutins daûr lis rogazions, le dutrine,le glesie, il morar des ciriesis, e dut chel mont covât de genuinitât di mari nature. No je dome une conte al è un saç real di storie su le vite stade che par merit di une buine pene nus torne chei timps. No ai ancjemo let il tratât di fuguline, penis fat puartarai il gno parê. Lussian
E ancje Fuguline a à metût in spieli par ben lis rogazions, in chei timps l’ uman e le nature cu le guide de glesie fasevin cuarp unic cun reciproc rispiet, indula che mari tiere no dave sôl nutriment alimentâr, ma ancje spirituâl, cu lis sôs bielecis ancjemo intatis che davin tante fuarce ai sudats sacrificis di che puare int .Biei ricuarts graciis a Fuguline. Lussian