Il mus di Berto

Za fa un secul, la maniere ordenarie di lâ a Udin e jere di cjapâle lant e tornant a pît.
Une biciclete le veve il plevan pre Gjenio Gattesco a Sante Marie, ma darest pocjis e nissune, che anzit, tal disesiet, dopo la disfate di Cjaurêt, je vevin recuiside i todescs, ma il predi za tal doman al disponeve di une biciclete gnove, brincade tal curtîl de vile dai siôrs, cuartîr gjenerâl todesc, cjapade sù e vie, cu la gabane svintulant.
“Un’altre biciclete, siôr plevan!?” dissal Bepon al predi, tal viodilu passâ.
“A robâ ai laris, no si fâs pecjât” dissal Gattesco.
Di Listize e rivave ancje la coriere dai cjavai direte a Udin, une caravane tirade di doi cjavai e dentri dut a scûr, cun dôs bancjutis dulà che la int si comodave, ma tocjave paiâ la corse pe comoditât di pôcs privilegjâts.
Un’altre possibilitât ancjemò di lâ in citât a Udin e jere di cjapâ il taxi.
A Sante Marie, di taxist al faseve cumò o dibot Berto Capat cul mus, un mussut za vieli ma fidât, che al tirave cul so pas un cjaruçut di len. Il servizi nol jere di paragonâ cu la coriere, ma al vignive un franc di mancul e cul lusso compagn di podê lâ a Udin stant sentâts.
Dopo vêi imprometût a Dusuline cetantis voltis, vie pal an, che se e stave buine, a levin une volte a Udin cul mus di Berto, e je rivade, fuarce di vitis, la zornade che la none Rigjine cu la frutute a son montadis sù a buinoris e inviadis in citât tun svol. Tun svol par mût di dî, stant che il mus, cun dut che Berto blestemant lu pacàs ogni moment cul stombli da la scorie, no si è pensât une volte che je une di fâ une corsute, al leve cu la sô bonace a pas a pas, fermantsi ogni moment a spilucâ un fros di jerbe sul ôr dal fossalut o spandi l’aghe pacjific sul stradon di Udin.
E jere sul cjaruç, direte a Udin, ancje la femine di Berto. Biel che il mus si è fermât un lamp a tirâ flât, subit passât Puçui, la femine di Berto e je dismontade dal convoi e cuntun pas legri e à cjapât a pît in direzion di Udin.
“A voi, jo, Berto” disè jê, “si viodìn al Stalo.” Il Stalo al jere un puest in place, prin jentrant a Udin, pe soste di ducj i cjaradôrs e dulà che Berto Capat al parchegjave il mus. Pe none Rigjine, nancje pensâsi di dismontâ dal taxi, cumò che a vevin paiât tant di biliet.
In dôs oris, par dîle grande, si rivave a pît di Sante Marie a Udin. Ma Berto cul so mus, la none Rigjine di Piso e Dusuline a son rivâts al Stalo che al jere di un pieç sunât misdì. La femine di Berto e veve za fatis a Udin dutis lis sôs robis. Si tratave cumò dome di voltâ il mus e tornâ cjase, prime che e vegni jù la gnot.

di Ivano Urli
#955

1 comment