Dimensionomanimetri

Che no esistessin dome trê dimensions, no lu veve di sigure scuviert jê, ma di rivâ adore a savê cualis che a jerin chês altris, chel po no, chel Mafalde no varès mai podût imagjinâlu.
Vada pe cuarte, il Timp, che come che a pandevin i filosofis des etis antighis al deve un sens a lis primis trê. Ma za cu la cuinte, il Snait, e veve scuviert vonde par fâ puest al Nobel te vetrine di cjase. Se il Nobel i fos interessât…
Pues crodi. Studiant il dimensionomanimetri, un machinari a forme di gubane eletriche che e veve metût adun dilunc de cuarantene, a saressin bastadis pocjis modifichis par strenzi il tamês e slargjâ i voi ai oms.

dimensions

E lavorà come une sfolmenade, e une daûr chê altre, la machine i pandè lis dimensions di chest mont in rapuart a chei ce lu vivevin: il Sunôr, il Nasebon, la Empatie, la Creativitât, la Fantasie, la Cjativerie, il Sticeboris, la Sgrimie, il Mastiefumate… Al bastave cjapâ in man l’imprest, fracâ il boton “Invie dimensionament” e intun marilamp, sul schermi, si viodevin lis misurazions.
E veve scuviert plui di vincj dimensions, ma a ‘nd jerin di sigûr altris. Ma intant… une maravee di scuvierte! Un strument che al varès cambiât il mont!
No i restave che meti adun lis scjalis di misure. E cjapà la machine in man e le fasè partî. E velis li, lis “Mafalda’s dimensions”.
Benon par chês che si savevin za.
46 Altece, 168 Lungjece e 23 di Largjece. Centimetris, clare!
Pal Timp nol coventave nuie: al segnave la ore e nol si fermave.
Ben cui sunôrs. Il Dimensionomanimetri le considerave 31. Di sigure decibel, ma za li e scomençà a vê fastidis. La intensitât di un griâ di grîs no sarà migo compagne di un zes che al sgrie une lavagne? La sô dimension di Sunôr di ce cualitât jerie?
E pe Sgrimie, che e segnave 1005? E Creativitât 763, Empatie, 8,82; Permalositât 2,3987? Ce misuris jerino? Ce significât vevie di dâi? E molà un porco, e ve li che la dimension Uce e passâ di 65 a 74. E varès viodût ancje il nivel di Fastidi rivâ a 23980, se te sere stesse no ves vût bielzà fracassât il dimensionomanimetri a fuarce di martieladis.

CovidCurte day 20 – Conte nr. 5
#965

1 comments On Dimensionomanimetri

Leave a reply:

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît