CovidCurte day 20 e Conte dal Mês

Mandi a ducj! Sêso pronts? Passade ben la Pasche blindade? Sperìn di sì, ancje parcè che us spiete un pôc di lavôr… a cui?
Ma a voaltris, iscrits ae liste di Contecurte!
L’Ostîr al à pene finît di meti adun lis contis rivadis e al à une vore di gust di dîus che a son in linee cun i contecurte days dai ultins doi agns: 12 contis.
Al mancje cualchi afezionât, ma o savìn che in chescj timp di sierade la creativitât e scjampe vie e o sin bielzâ contents di ce che o vin vût. E cun di plui, lis contis a son – come simpri – diferentis fra di lôr e si lein cun gust. O vin chês cu la ironie, la fantasie, la maluserie… e ancje se no vin dât il teme obligatori, ma libar, dentri des storiis al è saltât fûr, o di rif o di raf, l’infet che nus sta tignint sierâts in cjase come pantianis. Pantianis laboriosis, però. Si che duncje, cumò tocje a voaltris, iscrits ae liste di Contecurte.
In curt o tacarin a publicâ sul sît, in forme anonime, lis 12 contis che a partecipin al nestri CovidCurte Day 20, e cuant che o vin finît us rivaran vie mail lis istruzions par votâ.
Ve ju chi, par stiçâ la fantasie, i titui des contis che si sfidaran par cjapâ la Corone dal Covidcurte Day!

  1. Lis metamorfosis
  2. Miercus di cinise
  3. Vir jus (ah, om, la justizie)
  4. Libars
  5. Dimensionomanimetri
  6. Une bussade a comant
  7. L’ordenadôr
  8. Isaac
  9. La gote
  10. Prove di amôr
  11. A cene cul Signôr
  12. ISS

Se cualchidun nol è ancjemò iscrit ae liste di Contecurte, che al spessei, che vuê o sin ai 15!
E alore? Al disarà cualchidun. E alore l’Ostîr e la Coghe, cul jutori de Sartore, ancje par chest mês a son rivâts a meti dongje La Conte dal Mês, ven a stâi la conte lungje che us regalìn ai 16 di ogni mês. Us disin za che ducj trê o sin contents dal risultât. L’articul de Coghe al è bielonon, il dissen de cuvierte al è stât fat e l’Ostîr al è content di ce che al à scrit. Par ricevile, come simpri, al baste sedi iscrits, si che duncje… Se magari o vês gust di regalâ a cualchidun la ocasion di lei par furlan e deventâ protagonist, votant lis contis, sparniçâit chest messaç!

Mandi a ducj!

(Come simpri, par iscrivisi o cjatais il spazi par someti la vuestre mail là a man drete, adalt, se o sês suntun ordenadôr, e lant jù jù jù, se o sês suntun telefonut)

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît