A maridâ la femine si sta ben un mês, a copâ il purcit si sta ben un an

E nie, a la fin, Dree al veve cumbinât di nuviçâ Catine.
Jê, biele come il soreli, sane di no podê cjalâle cence sossolâ di desideri e, cun di plui, ferbinte e ninine e zentile e tal jet… insome… si sin capîts: une femine di sposâ! E propit par chest, lui al veve cirût di scurtâ i timps dal matrimoni. Da rest, nol vevie fatis di ogni par robâle a chel gnognul di Terenzio, chê femine maraveôse; e dopo par tignî a distance ducj chei moscjons che i ziravin ator. I voleve ben, sigure, i mancjarès po altri, ma za la dì des gnocis a vevin scomençât a tichignâsi. Varessin vût di lâ vie tal indoman di sere, par il viaç di gnocis, e a vevin dut il timp par no lassâsi come cjans e lâ a bevi la ultime in sagre e tirâle a la lungje cui amîs di ducj i doi. E ce vûstu che al sedi se a jerin ancjemò vistûts di nuviçs… anzit, no jerie une figade? E po, jere tradizion di zuiâ a la loterie dal purcit! Ma jê signornò… nie di fâ! La dì des gnocis bisugnave passâ la gnot insieme, e bla bla bla… vie indilunc cun altris mignagnulis, come se no durmissin za tal stes jet di mês. Si jere cuietade dome cuant, un cûl di stropâ il Tiliment, Dree al veve imbrocât il pês dal purcit, e lu veve vinçût! La stesse sere, fissade juste un mês dopo di chê date, si jerin metûts dacuardi par purcitâlu!
Une zornade di fieste come pocjis, di tant che vevin bevût e mangjât, ancje se Catine no fermave di cridâ a ducj cuancj par che a sporcjavin chi o a vosavin là.
E al fo propite intant che al meteve te cjanive salams, luianiis e sopresse, pensant a ducj i biei moments che al varès passât cun lôr intai mês che a vevin di vignî, par une cene in companie o denant di une partide di balon, che Dree al scomençâ pardabon a rifleti su chês dôs bestiis maraveosis e su la contentece che une i varès dade di chel moment in poi e chê altre, pûr trop, dopo nancje un mês, e steve za fermant di dâi.

di Rafaêl Serafin
#936

2 coments On A maridâ la femine si sta ben un mês, a copâ il purcit si sta ben un an

  • Come che o savês nol è il titul, che al è di induvinâ tai coments. Cemût? Facil! Il titul de conte al è une detule che e à a ce fâ cul purcit, che si sa, in Friûl, se al è di sielzi fra frice e purcit, al va a finile che un al sielç lis fricis di purcit e al è content cussì 🙂 No pal Dree de conte, però, che… no, nuie, us tocje lei par viodi se rivais a induvinâ il titul!

  • Pingback: CoroneCurte! | Contecurte ()

Scrîf un coment

This site uses Akismet to reduce spam. Learn how your comment data is processed.

Site Footer