Buine bocje, bon purcit

Se al jere un che al saveve une vore ben ce che a son lis prepotencis, chel al jere Purciel.
Purciel che no si clamave di sigure cussì, ma che aromai lu cognossevin ducj cun chel non, a scuele, soredut par i milante dispiets che i fasivin e che spes altri no jerin che ats di sfolmenade violence gastronomiche. Purciel, cu la sô tressadure imponente, al varès podût comedâ ducj chei bravats che lu tormentavin in doi e doi cuatri a fuarce di scufiots. Ma lui nol faseve mai riviel.
«Supo Purciel! Mangje cheste bontât!»
«Purcielat! Purcielat! Gloti dut jù pal gargat!»
«Bon, nomo? Scometin che tu vûs une altre sedonade?»
E denant di lui no jerin mica porcariis, come che o crodês. A jerin pitancis che cjapadis une par une a jerin normâls, si no fintremai golosis; ma tai messedots che i vignivin proponûts a deventavin plats di sgrisulâsi e dâ di stomi.
Brovade e cjocolate. Salam cu la mîl. Barecocui tal muset. Gubane cu la maionese. Frico e paneton…
A fasevin a gare a intivâ i miscliçots plui fûr cu la cassele e stomeôs, obleantlu a mangjâ e a fâ ancje muse di sodisfazion.
Purciel al taseve. Al taseve e al mangjave. Al veve tasût ancje cuant che a vevin tacât a dâi polente e furmiis o un pagnut cu la sopresse e i zupets.
Cuasi nissun si veve domandât cemût che al rivàs a sopuartâ dut. Anzit… a tancj, cuant che a fuarce di insisti i mostrave la muse schifade e si refudave di finî, i pareve che al fasès fente. Che lu fasès tant par fâju contents.
Dome cuant che al veve passade une buine etât, sul International Journal of gastronomy and food science, riviste che in chel an lu nomenave Chef plui babio di dut il mont, Purciel al veve confessât che a lui chei pastròs che lu obleavin a parâ jù i plasevin une vore! Al jere di chei che al veve tirât fûr lis sôs ideis plui inovativis, che cumò lu vevin rindût siôr e inomenât.

di Rafaêl Serafin
#942

2 comments On Buine bocje, bon purcit

  • E us vin dit che us tignin companie une vore di plui, cul nestri progjet coronecurte, in chescj timps cussì dificii. E alore usgnot lis contis a son adiriture dôs. Dongje chê dal Famei, si zonte l’Ostîr che us regale une conte dal purcit. Il titul, difati, al è une detule furlane che e à a cefâ cul purcit. Cuissà se cheste setemane la induvinais… Viodin!

  • No sai ce dî, o ai dome di conferma veretât su le conte di Rafael. Timp indaûr mi an invidât a gnocis, e inte liste dal pâst no jere une vôs che cjapas dentri le nestre lenghe di adozion, chel dongje di cjadree mi disè che jerin specialitâts de cusine di france, spagne, angletere, e ce saio jo, cenonè o ai ordenât un plat cuntun non che mi lave ben di cjacaralu ancje parcè curt, e ce mi capitie dongje tre sivilots cusîts intôr di doi cisarons, e ator , ator di chest plat dai sghiribiss di une pomade maron cun tante someance ai sbits de gjaline, par furtune che lant cjase mi soi fermât te frascje di Pulimie a mangja slepes di formadi come lis mans di puar Carnera cun polente cjalde e bacò di ort puar. Altro che cogos di vuê a fa potories che nancje il purcit di grasse nol intint fâ fraie cun lôr. Se jus invidin a gnocis spiçait lis orelis cun cheste biele conte di Rafael che nus met in guardie su le cusine moderne. Lussian

Leave a Reply to Anonim Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît