Buine bocje, bon purcit

Se al jere un che al saveve une vore ben ce che a son lis prepotencis, chel al jere Purciel.
Purciel che no si clamave di sigure cussì, ma che aromai lu cognossevin ducj cun chel non, a scuele, soredut par i milante dispiets che i fasivin e che spes altri no jerin che ats di sfolmenade violence gastronomiche. Purciel, cu la sô tressadure imponente, al varès podût comedâ ducj chei bravats che lu tormentavin in doi e doi cuatri a fuarce di scufiots. Ma lui nol faseve mai riviel.
«Supo Purciel! Mangje cheste bontât!»
«Purcielat! Purcielat! Gloti dut jù pal gargat!»
«Bon, nomo? Scometin che tu vûs une altre sedonade?»
E denant di lui no jerin mica porcariis, come che o crodês. A jerin pitancis che cjapadis une par une a jerin normâls, si no fintremai golosis; ma tai messedots che i vignivin proponûts a deventavin plats di sgrisulâsi e dâ di stomi.
Brovade e cjocolate. Salam cu la mîl. Barecocui tal muset. Gubane cu la maionese. Frico e paneton…
A fasevin a gare a intivâ i miscliçots plui fûr cu la cassele e stomeôs, obleantlu a mangjâ e a fâ ancje muse di sodisfazion.
Purciel al taseve. Al taseve e al mangjave. Al veve tasût ancje cuant che a vevin tacât a dâi polente e furmiis o un pagnut cu la sopresse e i zupets.
Cuasi nissun si veve domandât cemût che al rivàs a sopuartâ dut. Anzit… a tancj, cuant che a fuarce di insisti i mostrave la muse schifade e si refudave di finî, i pareve che al fasès fente. Che lu fasès tant par fâju contents.
Dome cuant che al veve passade une buine etât, sul International Journal of gastronomy and food science, riviste che in chel an lu nomenave Chef plui babio di dut il mont, Purciel al veve confessât che a lui chei pastròs che lu obleavin a parâ jù i plasevin une vore! Al jere di chei che al veve tirât fûr lis sôs ideis plui inovativis, che cumò lu vevin rindût siôr e inomenât.

di Rafaêl Serafin
#942

2 comments