Cjar di purcit e vin di cantine a slontanin ogni midisine

Pocjis a son lis robis che no si rivin a movi, a chest mont, e une di chês pocjis a son lis convinzions de int. No si rive mai ben a intivâ cuant che a nassin, su cualis fondis, par cuâi misteriôs parcès, ma cuant che cualchidun si convinç di alc, no son Sants che a tegnin: no esist veretât, o sience, o evidence, o savi consei che al rivi adore a fâi cambiâ sintiment.
E Terenzio, setante Viertis su la schene, tal rispuindi ai curiôs che i movevin la acuse di un acuardi cul diâul, non scjampave di cheste regule.
A lui, che al pareve vê vincj agns di mancul e al veve in cuarp la fuarce di un di zovin di trente, no i vignive migo iniment des lungjis spassizadis tal aiar bon dal crica dal dì, o lis zornadis a boscâ tal vert, cence oraris e fastidis, plenis di fature sane. No i vignivin iniment nancje lis sôs cenis fatis di verduris dal so ort e i gustâs saurîts cu la cjar des sôs bestiis: purcits, gjalinis, cunins, une vacje… che i devin lat, ûfs, arost, bistechis.
No si visave nancje di no jessisi mai sposât, ancje se al veve vût simpri feminis ator; e nancje di no vê mai tardât ni a sveâsi, ni a lâ a durmî, in gracie che nol veve mai pensât che e ves di jessi une ore juste, par chestis azions, ven a stâi che ogni ore e jere chê juste.
E ancje cumò, tant che la albe, daûr de schene, e slusorave il spieli e une barbe cence nancje un pêl di grîs e colave tal lavandin, intal so riduçâ e parsore de taule e jere la sô stramaledete convinzion: mieç litro di vin ros e cinc fetis di salam fresc, grandis cetant di stâ inpins di bessolis. Cussì Terenzio al faseve di gulizion, chest al jere il so acuardi cul diaul. O almancul, lu al jere convint che al fos cussì, e cui al varessial mai rivât a fâi cambiâ idee!

di Rafaêl Serafin
#946