Un dramma condiviso raccontato con poesia
La Conte dal Mês di Març
Pocjis cjacaris!
Ca di pôcs minûts e partìs la mail cu la Conte dal Mes di Març, il regâl che nô di Contecurte o fasìn ai nestris iscrits ae Liste di Contecurte!
E come ogni mês us lassin l’incipit de conte, par stiçâ chei che ancjemò no son iscrits te liste a iscrivisi e ricevi il regâl.
No us disìn cuâl che al è l’argoment de conte di chest mês, ma o podês forsit intivâlu savint che la storie e je ambientade in Cjargne e che cheste imagjin al è un dissen di Jacum, un dai nestris piçui aiutants di Contecurte. Dentri de conte o podês cjatâ ancje il dissen di Ricart, l’articul de nestre Coghe, une vore interessant, un biel pôc di cjargnel curât dal nestri Cramâr Pablo e, come simpri, la cuvierte metude adun de Sartore partint di un dissen dal Ostîr.
Il titul de conte? Boris… e ve chi cemût che e scomence…
Al è un moment, te vite di un om, dulà che la etât si mostre in clâr, saltant fûr des andronis scuris dal cuotidian. Ti si pare denant, ti cjale in muse, cualchi volte cun gracie, plui voltis cun malegracie, e ti oblee a scoltâ ce che e à di dîti. Tu puedis ben fâ fente di vê premure, come che si fâs ator par Udin, cui neris che a cirin di venditi un gjornâl o cun chei pucefadiis plens di morbin par fâti meti une firme – e scuediti bêçs – par cheste o par chê altre associazion. Cun jê, la etât, no tu puedis fâ di mancul di bonâ il pas e fermâti, parcè che e jemple il troi intîr dal to doman.
«Cjalimi chi, trop che o soi cressude! Varessistu mai dite che o sarès deventade cetant grande in cussì pôc timp? No mi dîstu nuie?»
Ben o mâl, simpri chest al è il so discors.
E alc, in chel moment, ti tocje di rispuindiji, se no a peraulis, almancul cul pinsîr. E daspò, al sarà simpri plui dificil platâ intun cjanton de memorie ce che tu i âs rispuindût.
____________
Se vês voie di lei il rest, iscriveisi lâ in bande sul sît o chi sot sul telefonut!
Mandi a ducj!
2 comments
Lasse une rispueste
Dutis lis contis
O sin rivâts a le tierçe conte, regaladis dal ustîr di contecurte. Il gno judizi su di lôr al è un grun positîf ; prin di dut par chel esponi fats vêrs di vite nestre, dopo par compagnaju in usancis, tradizions, e costumance in folklôr dut furlan, pifanie, i tomâts,lis cidulis e V.I. . E dopo le grande possibilitât di impara le grafie juste de nestre lenghe intal scrivi e cjacarale, jo o ai capît alc dopo frecuentât contecurte, ancje si come soi cjastron di nassite mi ven tant dure ferma te coce lis lezions.
O ai cjatât un grun interessant ancje “incidulido incidulado de fuguline” ancje ulì al è cetant di imparà , stories di vite stade, proviarbs, events dal timp, lavôrs, in sumis un mont dut biel gnûf di scuvierzi. Un consei me, ISCRIVEISI e ricuardaisi che al è dut dibant cence dismovi il tacuin . Lussian
Grassie Lussian! Tu nus ds simpri sodisfazion! O sin une vore contents che il progjet ti plasi. E ti disarai che o sin contents une vore ancje nô di vêlu fat. 🙂