Il cano

“In bancje nol ere un canocjâl!” gjo, a mê mari, par finî la storie di chê altre volte.
“E cui no erial, alore?” disè jê.
“Nol ere nancje un cjan, tu âs cjapade Rome par Tome” gjo.
“Cjan, par talian cano!” disè jê, tacant alore infalibile a contâ chê di sô none di Piso.
La none e à vût tai voi in vite il slavin di soldâts pal paîs e tes cjasis in timp de Guere Grande dal cuindis disevot. Soldâts talians, sul imprin, fin dal disesiet. Todescs e di ogni gjenìe puartade dai todescs, dopo la disfate di Cjaurêt, e ancjemò talians cu la vitorie, tant che la none e à vût tai voi soldâts e il flagjel de guere, fin che dal trenteun e je muarte.
E un soldât e à crodût di viodi sul puarton, puare femine, une dì che al veve metût pît un forest cuntune biele barete cul frontin, jentrât par baratâ cjastinis.
A dilunc dal curtîl di Piso al jere tirât adalt un filistrin, de puarte di cjase fin sul puarton, dulà che e podeve cori tun anel la cjadene dal cjan blanc di Piso, paron di talpinâ alore sù e jù, di un soreli al altri.
“Graduato” e conte Dusuline di vê sintude la none businâi di sù la puarte di cjase a chel des cjastinis sul puarton, “jentra pel puartelo che pel puartono senò va fuori il cano.”
De none, mê mari e conte saldo ancje chê de pipinute di zes, la volte che e jere restade di bessole, chiste none, e tratant che Dusuline di siet vot agns e les a durmî cun jê, i veve prometût di regalâi une pipinute, tant che, pe gole de pipine, Dusuline e je lade ancje un dôs gnots, traviersant dilunc sù il paîs, ma di pôre dal scûr e ancje de none che la gnot e ronceave, dopo no je lade plui, pazience pe pipine, che intant la none e veve za comprade, in fiducie, e cussì je à dade distès, no savint ce fâ di une pipine a chês etâts, ma subit daûr la pipinute di zes e je colade e distacât il cjâf, si viôt che la frute no le veve propi vuadagnade.

di Ivano Urli
#932

1 coments On Il cano

  • Simpri biel lei lis contis di Ivano, leadis ai timps di une volte, indula che il sentôr de fantasie su di cui lis lei vuê no al è nialtri che la veretât di îr, e par chei fruts di îr indula le mari ordenave ” va a cjolere i savori tal orto “, cui otante agns di vuê e reste tant terapeutiche le ridade parsore. Simpri meretâts compliments a Ivano. Lussian

Scrîf un coment

This site uses Akismet to reduce spam. Learn how your comment data is processed.

Site Footer