Crets

Il panorame che si gjolt di ca sù al è maraveôs.
Mi vevin visât che cheste valade e jere un spetacul, ma cussì biele no lu varès mai crodût.
O soi rivât chi pe gole di fâ une cjaminade in mont ae fin di Setembar; a vevin proviodût che il timp al tignive, frêt ma seren, sì che duncje o ai decidût di partî.
Ficjât tal russac alc di meti sot i dincj tor misdì, une gjachete pesante parcè no si sa mai, soi partît a buinore, in maniere di tornâ a cjase cul lusôr.
Viodi a montâ il soreli, la matine, daûr de cretis blancjis e je une vision che ti slargje il cûr. Il colôr dal cîl che al voltê dal grîs al colôr di rose fin a deventâ lûs arude, prime di rivâ al celeston, che si viôt adalt in mont, al dure pôcs minûts e e je une robe che ogni volte mi lasse a bocje vierte.
Mi soi gjoldût il tramont ancje cuant che al pareve che a vessin impiât un fûc daûr des cretis, di tant ros che al devente il cîl.
Cheste gnot al à fat avonde frêt, il cîl seren e il scûr di lune, che e je montade tart, mi àn regalât, come che si use a dî, une cuvierte di stelis, si viodevin dutis lis costelazions e il lusôr de Via Latee al faseve quasi clâr par tiere.
Cul montâ de lune e je passade a cjatâmi ancje une bolp cui doi piçui, cuasi dispatussâts, a àn nasicat ator di me e dopo son lâts vie, ma no jerin spaurîts nancje un fregul. O crôt che a tornaran a passâ di ca doman di sere.
O ai dut il timp, nissun mi cor daûr, a son cuatri dîs che o soi sbrissât e o ai batût il cjâf, restant sec, mi displâs pai miei se no mi cjatin, ma, o preferis restâ ca sù tes cretis, che fâmi meti in tun cimitieri condomini in citât!

di Pauli Fantini
#938

1 coments On Crets

  • E intant che o varès di jessi rivade a ducj la Conte dal Mês di Març, che cualchidun nus dîs adiriture di vê za let, noaltris no molìn e cul nestri gnûf contecurtâr Pauli Fantini o publichin la prime conte de setemane. Une conte che e cjacare di crets… e aromai, dopo che che cjacarave di tamossis e chê dal luvris, o varês capît che la vene di Pauli e je soredut ironiche… dute par voaltris, la bielece de mont!

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît