Cosmogonie

Sì. Le ai cjatade sot di un vieri mobil incarulât, sul cjast, o miôr – fasìn i figos, dai – tal gno “loft”. Une balute di plastiche, mieze rosse e mieze trasparente, cun tal mieç un cercli di cartoncin e la muse di Michele Dancelli, il coredôr. Me veve regalade un gno bon probarbe, Remo. Mes regalave simpri, chês balutis, e cussì mi jeri fat une colezion cun Mercks, De VlÆminck, Gimondi, Basso, Bitossi, Motta, Adorni, Zilioli e vie indenant…
A Lignan, te splaze dai predis, a la colonie Rosa Mystica, o fasevi lis garis tes pistis di savalon, cun Fantin e altris canais. O fasevin il Zîr di Italie, la Freccia Vallone, la Milano-Sanremo e, cuntun paviment di capis, ancje la Parigi- Roubaix… si sa… il pavé…
E cualchi timp prime, prime che mi regalassin il mappamondo, mi jeri fat une mê cosmogonie. Mi disevin che la Tiere e jere taronde ma jo le viodevi plate e alore mi soi dit: e sarà taronde come la balute di Dancelli. Nô o sin a stâ sul cartoncin, la emisfere sot di nô, chê rosse, e je la Tiere vere e proprie, la emisfere parsore di nô, chê trasparente, e je il cîl.
La mê cosmogonie e je durade pôc… cuant che Bertulin mi à regalât il mappamondo alore dut al è deventât clâr.
Figuraitsi che al dì di vuê e je int adulte che e pense a la Tiere come a la balute di Dancelli! E no ju metin tal manicomio. Cui sa parcè.
Bon. Dutis chestis nainis mi son tornadis iniment vuê, tal “loft”… cui sa cemût mai che la balute, uniche sorevivude de serie, e je saltade fûr cumò… no je la prime volte che o scovi il cjast…

di Checo Tam
#941

2 coments On Cosmogonie

  • E vuê al è sabide e aromai e je une abitudine, la conte dal Famei. E vuê il nestri Checo Tam ​al è lât sul cjast e al à cjatâ alc… anzit, tal loft. E di un ogjet come une bilie di un timp, lu savês, lui al è bon di tiranus fûr une schirie di ricuarts che ti butin dentri di un timp che nol è plui, ma che, in cualchi maniere, lui ti fâs pensâ che tu âs cognossût. Insome… no sês seneôs di savê di ce Cosmogonie che nus fevele? E alore vele chi, la conte dal Famei!

  • Che altre dì o soi lât sul cjast a cjapa su une gote tra doi cops, cenonè disore di un trâf puartant intun puest scuindût o ai cjatât il batecul che mi veve fat gno barbe di cuant o jeri frut, al jere restât ulì dismenteât par passe setante agns, mi soi fermât a scuadralu di ogni bande, sameave che mi cjacaras, e par plui di un moment o soi restât ulì a sintî e viodi un toc de me zoventût come intun filmât. Biele le conte dal Checo a riviestî moments se no altri cu le gjachete dai ricuarts. Lussian

Leave a Reply to Anonim Cancel reply

This site uses Akismet to reduce spam. Learn how your comment data is processed.

Site Footer