CoroneCurte!

Mandi a ducj, contecurtârs e cuissà, magari gnûfs letôrs che a son capitâts inte nestre Ostarie in chescj dîs che o vin ducj plui timp par stâ cuiets a cjase e plui pinsîrs che a àn bisugne di jessi discjolts.

Noaltris di Contecurte no podìn fâ di mancul di pensâ une robe: o sin la uniche Ostarie furlane che no à nissun fastidi a tignî viert in chescj timp di Corenevirus. (lu vin dite ancje cul nestri gnovissim banner su Fb) E alore savêso ce che us disìn? Che ancje nô o vin voie di fâ la nestre piçule part e meti adun cualchi azion par dâi cuintri a chest brut periodi a chest an bisest che al à propite voie di confermâ la detule.

E alore o tachìn la nestre ofensive, che o clamarìn CORONECURTE!

O vin scomençât propite cun usgnot. Tai limits dal nestri camarin e dal vuestri contribût o incressarin la publicazion des contis par setemane zontant a chê dal famei, la sabide di sere, ancje une dal Ostîr a teme purcit. Ve chi lis dôs contis di usgnot: Une sui tratôrs dulà e chê sul purcit che e à come titul une detule furlane sul argoment e o vês di induvinâle tai coments. Viodin cui che al è il plui babio a induvinâ. Insome, par chel che al rivuarde lis contis… no podarês dî che no vês nuie di lei.

E no si fermin cun cheste gnove. Us disin ancje che al sta par rivâ il timp dal… CONTECURTE DAY! Ma cemût? Il contecurte day? Ma dulà, che no si pues movisi, ma cemût che al sta sucedint di dut? Cuietaisi… che o vin cjapât une decision. Il Contecurte Day 2020 si fasarà dut in forme digjitâl e traviers la rêt!  O doprarin il sît, si inventarin une maniere par fâus scoltâ lis contis e voaltris, ducj voaltris, o podarês votâ vie mail. Al bastarà jessi iscrits ae nestre liste de Ostarie. Ma par chest no us disvelin altri… Setemane che e ven o savarês dut!

E a proposit di Conte dal Mês di Març. Propite vuê l’ostîr al à finût lis ultimis corezions e us dîs che no dome al è une vore sodisfat dal risultât, ma che chest mês, in bande dal super articul de Coghe Fuguline al à vût ancje il jutori dal Cramâr Pablo Gortan. Sì, parcè che la conte dal mês di Març e à dentri in piç di Cjargne. Anzit… ancje plui di un piç. E stant che o vês plui timp par lei, l’ostîr al à pensât di regalâus une conte un tic plui lungje. Il titul de conte al è… Boris. Insome… o sperin che o sedis seneôs di ricevile, ai 16 dal mês come simpri. E se no sês inmò iscrits, no stêt plui spietâ: iscriveisi!

Finide chi? No! L’Ostîr al è passionât di poesie scalembre. Il Famei al è passionât di scuadris di balon di une volte. Secont voaltris, chescj doi argoments a podino jessi metûts dongje? Il sintiment al disares di no, ma Famei e Ostîr no son int che e à sintiment. E alore tirait sù lis orelis, che su la pagjine Fb di Contecurte al podarès rivâ alc par contentâ un pôc chei che a son in astinence di balon! 

Insome… O vin propite voie dâus plui ocasions pussibilis par dîus:

Chei di Contecurte

4 coments On CoroneCurte!

Scrîf un coment

This site uses Akismet to reduce spam. Learn how your comment data is processed.

Pît di pagjine dal sît