Une solite bissebove a Pani

Ai 5 di Març dal 1955

L’ululament de bovadice ch’al fâs scriculâ i scûrs. Grampis di nêf bagnade sgurladis cuintri l’ûs. Parsore de legnarie il bandon scjassât dal vint ch’al poche sui çocs in tasse. Beadis di fedis ch’a furighin framieç des urladis. Sprocs di fum penç ch’a sfrissin fûr de puartele dal spolert scjafoiât de buere rabiose.
Une solite bissebove di Pani.
O pensi ch’al sarès biel usgnot stâ sentâts tal cjalt, ancje cence dî nuie, a consumâ cualchi strisse di tabac.
Ma tu no tu sês cun me.
Salacor vuê o durmirai ca, dongje dal spolert. Vuê che tu tu âs scugnût lâ a Tumieç. O voi a cjoli cualchi sfilzade in plui sul toblât, par ponimi intant che ti spieti. Ma a ret dal ûs, cu la man za su la cruchie, la orele ben usade, lis sint. Talpassadis. Ch’a crustin su la nêf dure di îr.
E che no son lis tôs.
O jes pe puarte dal camarin, sul daûr, par no fâmi scuarzi. Ma mal cjati denant. Scliçotât de nêf, ch’e rive intor a butadis, al à il dopli pront, cui paletons te cjane. Dreçât cuintri di me.
Il plui zovin dai miei scalcs. Al cognòs il lûc, il maldert. Al sa ch’e je la puarte sul daûr. Ch’e je simpri vierte.
I siei voi a son spirtâts, ducj smorfîts de passion che i art dentri. Si capìs ancje tal coni stret di lusôr che i bute intor il barcon.
Di passion par te.
Se cualchidun al vignarà a savê, che si visi simpri. Che si visi di cui che te gnot cantesemade di Pani al à sdrumât il Paradîs.
Prin ch’o puedi dî alc il sfolmenât al trai il scatarel. O sint par un lamp un brusôr fuart parsore dal cerneli, po la sô figure si sfante intun nûl di fumate rosse.
Il businôr fuart dal vint si bone a colp, dut al devente cidin: mi rive dome un buf lizêr di bueresine lontane, un rivoc di vueit, come che si pues sintîlu sote de Forcje, tune sere di Vierte inviade.
E nol è plui scûr: une sorte di soreli gaiart al slusore a dì plen dute la val. O viôt la mê bocje ch’e cîr di dî alc, ch’e vûl visâti di fâ a ments, di no tornâ sù; ma nissun sun nol ven fûr.
Po o foi alis e o peti come un svol di cagnàs, rût e svelt, fin dentri dal scûr neri dai peçs.

di Gianluca Franco
#920

___________
Toni Zanella (1887-1955), cavalîr dal lavôr e stele al merit, miôr cognossût tant che l’Ors di Pani, al è stât un paur, grant bacan di prâts, boscs, stalis e nemalie. Figure maestose, cun tante di barbe e cjavei a la “nazarene”, al à simpri prudelât la culture de malghe cuintri il grant patrimoni dai cjampeis de Cjargne. Cjapât dentri, voie o no voie, tai fats des dôs vueris, al è innomenât pe sô vite salvadie e pai siei estris fûr dal vade. Al è stât a dilunc cjacaronât ancje pal ‘savai ch’al varès inmaneât cuntune sô fie. E al fo par chest, tal ultin, che lu sassinarin.

2 comments On Une solite bissebove a Pani

  • O vin ancjemò un pocjis di contis dai vielis Contecurte Day di meti sù, o vin pensât di regalâus vuê propite la conte di Gianluca dal 2018, ispirate a une figure innomenade de Cjargne partigjane. Une conte dramatiche, che doprant un furlan che nol è di ducj nus puarte dentri di un fat di sanc, che però al mude in storie d’amôr e poesie. Cjapaisi il timp par leile e par tornâ a leile, jentrant dentri intune… solite bissebove di Pani.

  • L’ ors di Pani in Raveo al jere une grande persone, possident di bens e di palanchis al à judât tant il sio paîs, o jeri frut cuant i gjornai a an tant cjacarât di lui su chest fat promovût par motîfs di gjelosie da bande di un famei innamorât de fie dal ors. Lussian

Leave a Reply to Gelo Stellato Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît