Tamossis


O soi sveât adore, nol criche anciemò dì.
O spieti che al vegni sù il cafè par bevilu e partî, o ai za cjamât, îr sere, in machine il cavalet, i pinei, i colôrs e dut l’armamentari che mi servìs par piturâ.
Cualchi zornade fa o ai cjatât, ae fin de planure li che lis culinis a scomenzin, un puest là che al somee che il soreli, cuant che al jeve, si fermi par un moment.
Ae fin di Setembar la rosade e je simpri bondante e i prins rais dal soreli, rivant une vore inclinâts, e varessin di fale sflandorâ come pieris preseadis, par chest mi spieti une maravee di colôrs.
O voi a piturâ un cuadri, come che si use di “en plein air” no sai se o rivarai a rindi chel che mi spieti di viodi: o soi plui convint di butâ vie timp e colôr.
Fermi la machine, smonti, tiri fûr il cavalet e dut il rest, met a puest, prepari e ve che il soreli al tente di fasi viodi o spieti che al si decidi a cjapâ fuarce par dâmi la lûs juste cuant che cun la code dal voli le viôt.
E ven jù de rive, zovine, biele, cu le vieste che e tapone ma e lasse imaginâ e cjaminant svelte e môf la jerbe fasint colâ le rosade e la jerbe e cambie di colôr come il mâr cuant che e passe une barcje.

La lûs e il paesaç che o cirivi a chê vision a sparissin.
O rivi a capî a colp i grancj pitôrs: Botticelli cun le sô Venere, Tiziano cun la Venere di Urbin e Goya cun le Maja desnuda.
Le fermio? Ce i disio? I domandio se o pues piturâle?
E rive dongje di me .
Dai lavris mi jes la robe plui stupide che o podares disi: “Frute, dulà vâstu cussì di buinore?”
E jê: “O voi a cagâ tes tamossis che a cjase no vin il cagadôr”.

di Pauli Fantini
#923

3 coments On Tamossis

  • Induvinait! Induvinait ce che o vin? O vin un gnûf Contecurtâr in Ostarie!!! E no o vin simpri une vore di gust cuant che o rivin a tirâ dongje un gnûf client, soredut se al è un bintar di chei che a ti contin une storie di chês che a rivin a gjavati dai dincj une ridade. E alore… pronts a discuvierzi il nestri Pauli Fantini che nus contarà prest cui che al è, ma intant nus conte di un artist, nuiemancul che un pitôr, che al à di rivâ inte nobile imprese di piturâ un sogjet… maraveôs… Lei, par scuvierzi ce robe! E benvignût su Contecurte Pauli!

  • Pauli , Pauli, e jo che cun che biele rapresentative di peraulis a crodi cuasit fin insomp, par dopo resta smierdât de ultime rie de conte, ma cun bocje di ridi.Continue che tu âs le vene juste par meti il bon umôr. Lussian.

  • Pauli benvignût te Ostarie di Contecurte. Mi fas eco des peraulis di Lussian e o speri di fâ altris ridadis.

Lasse une rispueste a Anonim Cancele rispueste

La tô direzion di pueste eletroniche no sarà publicade.

This site uses Akismet to reduce spam. Learn how your comment data is processed.

Pît di pagjine dal sît