Stiefin Wilson

Al sune la ghitare Stiefin.
Al dispense felicitât. Al prodûs droghe legâl. Al invente cjançons.
Il mio çurviel al è colegât.
La mê ment e je in sintonie cui siei suns.
La mê ment si insumie.
O soi in orbite intor de Lune. Cumò.
O viôt il tramont a riis zalis disore de culine dal cjascjel. Cumò.
O voi ator par chê strade di militârs in montagne cun chei suns di tastiere siderâl…
Cumò.
Avost di tancj agns fa. Cîl blu e la musiche di Moonloop e veve ancjemò di vignî ma jo za le spietavi. O spietavi la ghitare floydiane di Stiefin.
O spietavi i suns de primevere.
I miei lavris a son colôr cinise.
Lis palpieris si sierin. Mi insumii.
Ancjemò.
I luncs cjavei di Stiefin a svoletin. La int si môf. Un cjocat al berle “Pink Floyd Pink Floyd!”
Lis lampadinis blu si piin. Une more riçote e je in prime rie, dute cjapade. Stiefin, ocjâi scûrs e discolç, al dopre la ghitare come se e fos une estension dal so cuarp.
O sin tal 2001 Xò. Migo tal 1970…
E pûr…
I suns eletronics di subfundus a somein chei dai Tangerine Dream.
No ai dibisugne di stâ a fevelâ di monadis tal mieç dal fum cun altre int…
Stiefin e la sô ghitare che e gnangole a pensin ancje par me.
Il mio cuarp al è poiât dongje dal arbul dal riç…

di Checo Tam
#918

2 coments On Stiefin Wilson

  • Aromai, cu lis contis dal Checo Tam​ no savês plui ce spietâsi, vere? Mo ti conte di nonos, mo di fantasience, mo di feminis… ma se al è un teme che al torne simpri e je la musiche. No par nuie, ca di mancul di une ore, su Radio Onde Furlane​ o podês scoltâlu in Indigo, la so trasmission radiofoniche di ogni sabide. Nol sarà sigure chest Stiefin Wilson, a sunâ, ma lu podês imagjinâ cun cheste conte, che e partìs come cjançon e e va a finîle come omaç… E di sigure ti fâs vignî voiê di scoltâ un pocje di buine musiche!

  • E lis alis dal Checo no si fermin di svolâ su lis notis modernis di ghitaris ultraterenis, indula che le musiche no dibisugne dal aiar par rivâ le passion di cui scolte. Lussian

Leave a Reply to Anonim Cancel reply

This site uses Akismet to reduce spam. Learn how your comment data is processed.

Site Footer