Sophia

Sophia e à muse di cuninut.
Sophia e je dute curvis. E à voie di vivi di optionals: e à doi celulârs, pal moment.
Mi plâs.
“Ce ti plasial di jê?”
Mi plâs dut: se e fos crote i lecarès dute la piel.
“Sêstu sporcacjon?”
Sporcacjon? Cui no lu saressial a viodi il mût che e cjamine?
“Âstu dome tal cjâf feminis?”
Sì!
I cjareçarès ducj i cjavei. Cuant che si môf e somee svolâ… e je une agane, une fade.
O lavori cun jê e a fuarce di vêle dongje mi soi afezionât.
E bute intor di se cuintâi di profum… profum… aphrodisiac!
Di astât o sintivi il so vêr odôr… la sô piel… la sô frescje nature…
Une gnot me soi insumiade. E veve une buse daûr de schene, te cjar vive. Come une sieradure. Jo i metei une clâf daûr de schene e je e tacà a movisi come chês pipinis dai carillons. E faseve dut ce che o volevi. Naturalmentri… dutis lis robis plui erotichis.
Mi plasarès pleâle pardabon a la mê volontât e no dome tai insiums.
Però… al è un però.
Jê mi à dit che o podaressin ancje viodisi: mi fasarès cognossi i siei amîs che a àn vincj agns mancul di me e jo, ancje se come stîl o soi avonde moderni, o somearès matusa a lôr.
E di ce varessio di fevelâ? E je int cagone. A son di sigûr o borghês plens di TEDIUM VITÆ o fîs di operaris che a àn comprât lis scarpis di gjinastiche di 200 euro (€).
Di ce aio di fevelâ? Dal ultin model di telefonut o dal Grant Fradi? Ce program chel… se o podarès…ta chê cjase i molarès il ZYKLON B tes conduturis di areazion.
Dulà vino di lâ? A cori ator par Vedinum?
Aio di instupidîle cu lis mês ideis scuris?
Ce dolce che e je la sô vosute.
Une dì i disei che e jere jê la mê pipine preferide. Jê mi disè che un so barbe, cuant che e jere piçule, i faseve chel biel zûc che a fasin i vielis ai frutins corint cul dêt tal palm de manute: e je une curte conte che cumò no mi visi… il cuninut… la suriute… il pradissit…
Sì, ancje se e je talianote e se e considere nô furlans come dai grês… e à vût un parint che i insegnave chês bielis storiis.
A sintî chê storie li jo… mi soi comovût…
O jerin a vore tal supermarcjât e, jessint insiemit tun spazi strent, o sin vignûts a contat. O ai fat a pueste a cjalcjâ cu la mê spale chei tenars piruçs che e à devant e jê, in cambio, mi à dât une lizere muardude te schene. O jeri li li par rivâ a la estasi!
I ai domandât a Sonja ce che o vevi di fâ par concuistâ Sophia. Ve ca la rispueste di Sonja:
“Niente. Non la conquisterai mai: è troppo diversa da te… è abituata a girare per le discoteche.”

di Checo Tam
#914