Fox trot

 

Une volte ducj a vevin il lôr sorecognon. Il non, il cognon e, cun di plui, il sorecognon. Ae latine.
A podevin jessi sorecognons di parintât. Par dî une, la nestre famee e jere chê di Jacuç e cussì gno pari lu cognossevin in paîs par Min Jacuç.
Altris voltis, il sorecognon al vignive dal mistîr e alore, a Sante Marie, a jerin Pieri Purcitâr, Franco Mecanic, Tite Cjaliâr, a jerin Chei dal Fari, Chei di Muradôr e, ore presint, ducj cognossin Mario Sartôr.
Altris voltis ancjimò, dal paîs di divignince, Chei di Tresesin, Chei di Mosse. O di une femine di innomine metude in lûs pal so snait o par vê rezût il pês de famee in mancjance dal om pal mont o muart in guere, e a Sante Marie a jerin Chei di Bete, di Batistute, di Jacume, di Mabile, di Sabine e vie dilunc.
Cualchi sorecognon al risultave necessari, tal piçul mont dai paîs di une volte, dulà che al dominave un cognon sôl (Marangone/i a Sante Marie) e pôcs a jerin ancje i nons in maniere che, cun ducj i Toni Marangon, si scugnive specificâ Toni Vuate, Toni Mosse, Toni Sindic, Toni Batistin e vie indenant.
Tantis altris voltis il sorecognon al vignive di une lampade lenghistiche di fantasie, in reson de figure, de ande o dal caratar de persone.
Fox trot al è l’ultin sorecognon che ai viodût nassi dal moment e po al à vude la durade di une gnot.
O jeri te vecje scuele elementâr, sede de Protezion Civîl. Il paîs, sot passe un metri di aghe dal Carmôr pe cuarte volte intun mês te sierade dal novantevot. La int, cu l’aghe in cjase, e telefonave li, e cun Dino di Sclaunic a disponevin vie radio il moviment tes cjasis des tantis scuadris de Protezion Civîl vignudis in socors.
Tor dôs, trê oris di gnot, o sintìn bati tal veri di un barcon. La scuele e jere une isule tun mâr di aghe corint di ogni bande. A batevin tal veri e Dino al è lât a viodi.
“Al è Fox trot rimpinât suntun barcon” dissal Dino, “va a viodi, va, che no si innei!”
Al jere un frutat bessôl, capitât di Cjasteons fin li, dut torteât tal tubo di gome di une pompe ator di se e rimpinât sul barcon parsore l’aghe. Si puartave daûr ancje une radio. Mi veve sintût par radio, saio jo.
“Che al viodi” mi à dite tal scûr, “che par radio no si à di pierdisi vie a fevelâ tant a lunc.”
“Nin dentri” gjo, “di no colâ ta l’aghe.”
Di radio al saveve ogni robe. Subit che vin podût, lu vin metût dongje de Protezion Civîl a dâ une man.
“Al rive Fox trot cussì e cussì” ur à dite Dino par radio a chei de Protezion Civîl.
al doman, al è lât a viodi dulà che al veve poiade la biciclete fûr paîs e nissun lu à viodût altri. Juste cumò che ducj lu vevin cjapât in simpatie e lu cognossevin par Fox trot.

di Ivano Urli
#922

2 coments On Fox trot

  • E aromai, la domenie di sere, us vin usât a lei la conte de fin setemane dal nestri Ivano Urli, che chest colp nus cjacare di Fox Trot… forsit, o forsit no. Dome di lei par scuvierzilu.

  • Culì Ivano al à tocjât un biel cantin tant doprât intai piçui paîs, ogni famee e jere batiade cuntun sorenon, e cussi ancje ogni persone, cence fa dismentîe che sot chest batisim e colavin dentri ancje i curtîls.Po dopo ancje nô di fruts si batiavisi cun nons di fantasie a seont lis tendencis individuals. Origjnâl ” fox trot” al jere di sigûr un radioamadôr, e son lôr che an regules precises intal gjestî le radio, tra lis tantis che di fa passaçs curts intes trasmissions. Lussian

Leave a Reply to Anonim Cancel reply

This site uses Akismet to reduce spam. Learn how your comment data is processed.

Site Footer