E sta par rivâ! La volêso?

Ce dì sino vuê? Ai 12, no mo? Sì, sì, propite ai 12 di Fevrâr e a mancje pôc ai 16 dal mês.
E ce al sucedial al 16? Bon… bisugne fâ il versamente de IVA e des ritignudis, che po, stant che al cole di domenie, si à di fâlu lunis 17. Ma no sin chi a visâus lis scjadencis fiscâls! Noaltris di Contecurte, il mês passât, o vin inmaneade une iniziative che cumò e sta par rivâ a la seconde puntade… LA CONTE DAL MÊS! 

Cemût saressie a dî, ce robe ise? Otante di voaltris, là di fûr, lu san bielzà! Sì, parcè che par cumò, te maraveose Liste di Contecurte, si son za iscrits in otante di lôr, che se o tignês cont che ta chê di prin a jerin in 8, poben… al è za un sucès, ancje se o sperin che la mail che e rive te direzion di pueste ogni lunis matine e sedi ancje un plasê e une comoditât par viodi ce contis che a son jessudis su la Osterie e se us interesse alc.

Ma la idee che nus à puartât a fâ lavorâ une vore la nestre Sartore e je stade che di regalâus une conte al mês. E a Zenâr la conte us è rivade puntuâl, e o sperìn che us vedi plasude (e no nus displâs ve conseis e judizis tai coments). E jere une storie in teme cul mês e e fevelave di pignarûl, di fûc e di vitis che a cambiin. E l’Ostîr, ancje chest mês, i da sot par scrivi la conte di Fevrâr, che e je cuasi finide. La Coghe, di part sô, e je daûr a meti dongje informazions sul teme che o vin sielt par il mês plui curt dal an, che tal 2020 al è un pôc mancul curt. Insome…. o stin lavorant par voaltris e anzit, o vin metût ancje un biel cont par ledrôs par stiçânus a jessi puntâls e stiçâ chei che no si son ancjemò iscrits a iscrivisi.

Par cumò us disin dome il titul de conte: LEN. 
E us disvelin ancje une altre robe. Te conte di Zenâr, vês di perdonâlu, l’Ostir al veve falât un non. Po ben… al à pensât di corezile e par ducj chei che si son iscrits te liste ur mandarâ la maniere di scjamâ la version corezude de conte (dome chei di Zenâr a puedin fracâ il leam, clare 😉 )

E us disin ancje une altre robe. Stant che si sin inacuarts che la conte in pdf e je biele di stampâle ma je dificile di lei sul telefonut, la nestre Sartore e sta metin adun la maniere di metile intun formât che al ledi ben di lei ancje sui telefonuts. Insome… dut chest par visâus che, se par câs no sês iscrits ae nestre liste, o vês inmò 4 dîs di timp par ricevi il nestri regâl di Fevrâr!

Cemût! Baste meti non e direzion di pueste eletroniche tal Corinus daûr vie mail e us rivarà un leam di fracâ te pueste eletroniche (e ocjo come simpri al antispam).
Al è dut… par cumò. Sparniçait, sparniçait, sparniçait!

3 coments On E sta par rivâ! La volêso?

  • Il 16 al è dibot chi, cui sa ce che nus conte di biel cheste volte l’ustîr. No sai se ducj a àn let che dal mês di genâr, se no lu veis fat vait a dai une passade, un cuadri perfet sul folclôr de befane, dongje…. ma no us dîs altri , vait a lei. Lussian

    • Brâf Lussian! Spie cence spiâ 🙂 Cundiplui, par cui che si iscrîf ae liste (là adalt a man drete sul PC, plui sot sui telefonuts) cun il 16 dal mês al è pussibil che al puedi rivâ ancje a vê la version gnove de conte viere 🙂

  • Pingback: La Conte dal Mês di Fevrâr | Contecurte ()

Leave a Reply to Anonim Cancel reply

This site uses Akismet to reduce spam. Learn how your comment data is processed.

Site Footer