Cul cjâf ben adalt

Vencedores seremos
porque somos titanes
sonriendo a las balas
y gritando adelante.
Si me muero que me muera con la cabeza muy alta.

Cuant che il scûr al vuluce dut e al pâr che no si puedi scjampâi, la lûs e pues rivâ ancje dal puest che mancul sal spietisi, fintremai de bocje di une metraie.
Nassût tun borc dal Cjanâl de Aupe, o soi usât al scûr. Framieç des monts al dure di plui, ma al è un scûr che ti cjarine, cu lis stelis che a cimiin adalt e i fûcs dabàs. Fûcs come chei piâts dai emigrants che nus puartavin ideis di avualiance e di libertât. Cussì, cuant che il scûr vistût cu la cjamese nere al à vuluçât ancje chestis monts, no soi stât bon di distudâ il fûc che aromai o vevi dentri. Miôr alore lâ in France che tant, un muradôr, al covente pardut. Ma nancje là la libertât no je par ducj, si scuen dâsi dongje e lotâ. E jo lu ai fat. E ta chê lote cence confins mi soi cjatât tal ’36 a Madrid: Dodicesime brigade, bataion Garibaldi, seconde compagnie, sezion metraiis.
A Madrid si cjaminave sul sanc e si respiravin faliscjis ma i vin dât une buine sacodade ai moros di Franco. E jo saldo indenant cu la mê metraie, bataie dopo bataie, fin che a Guadalajara mi àn sbusât fûr par fûr. Un pâr di mês e o jeri di gnûf in prime linie: di Huesca a Brunete, di Zaragoza al Ebro.
Chi ator lis culinis a son strassomeadis des bombis dal nemì. Il plomp al jemple l’aiar e al bruse il gargat. E pûr al è propit achì che o vuei stâ. Achì là che si combat pe libertât e pe justizie. Achì tes brigadis là che a sunin dutis lis lenghis dal mont. Là che si cjante «Si me muero que me muera con la cabeza muy alta». Se o ai di murî, o vuei fâlu cul cjâf ben adalt.
Une metraie e pese di no crodi. Nuie però che un muredôr furlan nol puedi vê a man. Cuote 467. No i mancje tant, ma canons e avions no le finissin di bati chest rivâl. Une volte insom però o sbrocarai fûr il fûc che o ai dentri, o sbregarai cu lis flamis de mê metraie il scûr che si puartin daûr. No i mancje tant, dome pôcs pas. Al è in chel che o sint la bombe che si svicine. Masse svelte par rivâ a parâsi. No avonde par fâ un ultin pas e jevâ il cjâf ben adalt.

di Carli Pup
#924

Notis sul personaç: Ivo Osvaldo Faleschini
Al nas a Mueç ai 6 di Novembar dal 1906. Muredôr di mistîr, inmò fantat al emigre in France. Par vie dal so ativisim politic, al è te liste dai ricercjâts de OVRA, la polizie politiche fassiste. Tal Otubar dal ’36 al jentre tes Brigadis Internazionâls che a combatin pe Spagne republicane cuintri dai golpiscj poiâts de Italie fassiste e de Gjermanie naziste. Al ven assegnât ae Dodicesime brigade, bataion Garibaldi, Seconde compagnie, Sezion metraiis. Al è segnalât come un dai miôr combatents e al ven passât prime sergjent e po tenent. Tal Març dal ’37, sul front di Guadalajara, al è ferît e al torne in France par curâsi. Tal Astât di chel an al è di gnûf in prime linie. Come cjapitani dal Prin bataion de Brigade Garibaldi al combat sui fronts dal Aragon e de Estremadura. Tal Setembar dal ’38, te suaze de ultime ofensive sul Ebro, intant che al è daûr a plaçâ une metraie in prime linie, al vencolpît a muart di une bombe sbarade de artiliarie nemie.

Notis su la cjançon:
1) «Vincidôrs o sarìn parcè che o sin titans / i fasìn bocje di ridi aes palotulis e o berghelìn “indenant!” / Se o mûr che o mueri cul cjâf ben adalt.» Lis peraulis a son gjavadis fûr de cjançon «Vientos del pueblo» dal grup catalan dai Ebri Knight che e met adun i viers di doi poemis dal scritôr e militant antifassist Miguel Hernández Gilabert (1910-1942).

2 coments On Cul cjâf ben adalt

  • Vuê e je la zornade de lenghe mari, e noaltris di Contecurte o vin decidût di meti sù une conte dal nestri Carli Pup, scrite par il Contecurte day 2018, che ancjemò no vevin publicât. Une conte politiche suntun personaç furlan pôc cognossût, ma che Carli nus à judât a cognossi cuntune note. E cundiplui o zontìn il link ae cjançon che e da il titul ae conte. Si cjacare ancje di Catalogne, al è clâr, e al è par chel che o sin a visâus de nestre lenghe mari, che po, e je chê di Contecurte.

  • Di cualsisei bande tiri l’ aiar di un ideâl su le persone, al va rispetât, al po sei chel just, e che il timp in nô no nus à dât a cognossi . Lussian

Leave a Reply to Anonim Cancel reply

This site uses Akismet to reduce spam. Learn how your comment data is processed.

Site Footer