Un blec di cîl

O vevi bisugne di vê un blec di cîl, un slambri di prât, un cjanton di flum indulà svualâ, rondolâmi, nadâ e… scrivi. O soi jentrade in Contecurte e mi soi sintude une vore parone dal blec di cîl, dal slambri di prât e dal cjanton di flum indulà che lis mês peraulis, i miei ricuarts, lis mês emozions a àn podût vivi cun gjonde la part biele di me, di une frute che no à mai vût amiis par fevelâsi e contâsi i dubis, i parcês, par ridi insiemi ancje di monadis. A torzeon pal ordenadôr po dopo une dì o ai lete une conte par talian: bintare come che o soi jo, cualchi volte, i ai scrit a cui che le veve metude dongje e i ai domandât il permès par voltâle in furlan. Rufiane o sfrontade jo, lui, il scritôr, al à vût bon cûr e mi à dît di sì. Ve le chi, sì che duncje, cun chel grop in gole che ti cjape cuant che di altris a scrivin chel che tu às dentri il to cûr…

Par cui scrivìno? Par noaltris prin di dut. E par chêi che, plui numerôs di chel che o pensassin, o scuvierzìn simii a nô. Parcè scrivìno? Par mil resons. Ma la reson vere e je che no son plui il paîs, o pûr il cuartîr indulà che si cognossevisi ducj. E indulà che une volte al jere il timp di pierdi timp par fermâsi a fâ cuatri cjacaris. Morestant chei altris al puest di cori noaltris.  No son  une vore di altris robis di un timp mighe no propit cussì indaûr: la stale – indulà che ducj a si cjatavin la sere par condividi lis storiis – e i siei erêts: il bar, il sagrât de glesie, la roste dal flum, il muret. A cui scrivìno? A chei istès e di chei istès che o lein chel che a scrivin par nô noaltris. E ancje a cualchidun che no podin dîi di dongje lis peraulis che o tachìn a chi parsore, magari parcè che no podìn fermâlu, nancje morestâlu, intal câs che lu incuintrìn pe strade, nancje invidâlu a sentâsi  sul muret…

di Barbara Battel
#912