Il miôr piruç al cole in bocje al purcit

Il nodâl si sentà maestôs sul cjadreon di piel nerissime, sot dai cuadris di Rembrandt e Monet, autentics, e dongje dal piano, toc unic e antigon che dome i cinc fameis di chel vecjat a podevin tocjâ, une dì sì e une no, par dâi cuintri, un par un, ai grignei di polvar. Ma il vecjat, cumò, al jere muart e dut chel patrimoni, fat di art e anticuariât, al varès cjatât la sô destinazion plui adate: jessi vendût! O cussì, almancul, a pensavin i parincj, nevôts e gnecis bramôs e insurîts che a smalitavin e si inscartossavin su lis cjadreis, intant che la buste cu lis ultimis volontâts, planc a planc, e vigneve sbregade e vierte…
Antonio. An-to-nio. Lis orelis a intivarin chel non a tocuts… An to nio.
Il vecjat al lassave cuasi dut il so patrimoni a Antonio.
Un coro di blestemis e malignitâts a cuvierzerin il nodâl, che serafic no lis calcolà. Antonio? Antonio?! Si che duncje… jenfri ducj lôr, vignûts di ogni bande, pronts a rispietâ cualsisei vincul, pûr di gjoldi di un ogjet, un sôl, insome… jenfri ducj lôr, il vecjat al veve sielt propite Antonio?
Antonio che nol jere bon nancje di fevelâ.
Antonio che in chel moment al jere sigure là che si imbultricave di cuissà cuâl paston, sfondantsi il stomi.
Antonio che si lavave dome cuant che al ploveve, e che al jere a stâ intun cjôt, e che a clamâlu no si degnave neancje di voltâsi, rugnant, e magari molant une sbitiade di fastidi.
Insome… une ereditât come chê li straçade par Antonio, il purcit di cjase di chel viziât, mataran, stramaledet, vecjat milionari!? Intal cidinôr de sale, lu si sintì, di là di fûr, rumâ tal pantan.
Al someave che al ridès!

di Rafaêl Serafin
#913

11 comments On Il miôr piruç al cole in bocje al purcit

Leave a Reply to Margarite Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît