Procreâ 1

Sì, a son dificii di imagjinâ chei doi…
Forsit a son dome un grum no ben definît di particulis atomichis.
Forsit a vivin su NGC 451 o su cualchi quasar, miôr, ce che nô o viodìn cumò come quasar…
Ma sì, dai…dingji a chei doi un biel aspiet marzian cun piel verde e antenonis e fasìnju fevelâ… o ancje… fasìn che a sedin fats di robe slichiote e a tachìn la nestre storie. Us disarai di plui… ju metarai suntun planet che al zire ator di Betelgeuse.
Betelgeuse le viodês cuasi ogni gnot… e je cussì familiâr…
No fevelin chei doi… si mandin des frecuencis che nô no podìn sintî… anzit, miôr, si trasmetin dai odôrs, par comunicâ. Jo o ai tradusût chei odôrs (triscj) in peraulis.
I nons? O sieri i voi e o bat su la tastiere des letaris a câs!

Fgottjll al comuniche cun Suehdt. A son ducj i doi verts e slichiots e a respirin fluoro.
“Ah, vuê o ai fate une grande invenzion, savêso, Suehdt?”
“Sêso simpri daûr a pierdi timp cun chei automis alì? Viodêt che il Ministeri de Vuere prime o dopo us gjavarà ducj i bêçs se o continuais a fâ mataranadis!”
Fgottjll al vierç a distance une urne di pseudo-veri-sylicât e al ven fûr un strani coso colôr di rose cun cuatri estremitâts e une sorte di bale ad alt; ta chê bale a son cinc busis… ma dentri di dôs di chês busis a son des balis blancjis cun tal mieç des sferis celestis… mah? Chel coso al à dai fîi parsore de bale…
“Ma ce mataranade saressie chiste, Fgottjll? No ai mai viodude une robe cussì! Al somee un Fomalhautian ma al à dome cuatri estremitâts… si movial?”
“Si môf, si môf! Al vierç une di chês busis che al à ta chê bale par comunicâ cun ondis di sun…”
“Ondis di sun? Ma a saran cent milions di agns che lis entitâts no comunichin plui cun ondis di sun!”
“O ai decidût di produsi chescj cosos e di molâju bande di DYTHI 458.”
“DYTHI 458? Ma nol è nuie là!”
“Par nô che o vivìn ta chest ambient di gas. Ma dongje di DYTHI 458 e je une piçule piere plene di hydroxigenon dulà che chescj cosos a podaran moltiplicâsi!”
“Hydroxigenon? Mi ven gomit dome a sintî cheste robe!”
“Il coso al vîf se tu i paris dentri par une di chês busis dal hydroxigenon e dopo al à dai systemis di respirazion… che a van a azotoxygenon…cumò al à une sostanzie protetive parsore parcè che nol è ancjemò ativât… te nestre atmosfere al murarès ma ta chê piere che e zire ator di DYTHI 458 si cjatarà ben!”
“Ma… e al Ministeri de Vuere us da bêçs par mandâ chestis robis su DYTHI 458? A fâ ce mo?”
“A colonizâ la piere par cirî di rompi un pôc i tabars ai Fomalhautians, no? Chest coso che o ai fat al è dome il prin di une lungje serie e dopo… si moltipliche in pôc timp. Prime o dopo ducj i monts ator di DYTHI 458 a saran plens di chescj cosos.”
“Us saludi, o Fgottjll… o speri che cheste mataranade no us fasedi pierdi la reputazion.”

E cussì il nestri bon Suehdt al va vie. Lu sintîso? Tindêt ben la orele…
“Slic slic slic”.

di Checo Tam
#910

Note: conte che e je stade publicade intune Comugne dal 2004, ma che nus plâs riproponi.

1 coments On Procreâ 1

  • Lis passions dal Checo di navigâ inte fantasience no à confins, lis sôs contis vuê come vuê e somein impussibilis.ma o stin viodint che planc a planc nus vegnin dongje veretâts ritignudis impussibilis fin îr. Ogni gnot che voi a pissa insomp dal ort o cjali il cîl cun dut chel sflandôr di stelis, e in automatic dentri di mê mi ven di dî, “ma ce dal dilembo ajal di jessi po lassu”. Compliments al Checo che al à za scuviert alc in chel dilembo . Lussian

Leave a Reply to Anonim Cancel reply

This site uses Akismet to reduce spam. Learn how your comment data is processed.

Site Footer