Nekronomikon!

O ai viert il Nekronomikon par cjatâ une formule adate e o cjalavi la foto di Ingevona che o vevi ritrat a Mittweida dopo dal conciert tal cjascjel incjantât.
O ai let la formule:

ISS MASS SSARATI SHA MUSHI LIPSHURY RUXISHA LIMNUTI
FAIO REVIO AID NELCATI CLA IOT SANTURE
SE CID REMTI ILI PJCFA SLAT INIRE TLEP ID GENI

Cussì mi soi cjatât tune cantine in Telemark e o vevi in man une ghitare ma no le savevi sunâ: jo no ai mai sunât la ghitare ma dome il sax. Mi cjali ben e mi nacuarç che no soi Orgnan o miôr lu soi dome tal çurviel. O ai il fresc cuarp di Ingevona! O ai il cuarp di femine ma la ment e je chê mê. La formule lete tal Nekronomikon e la concentrazion cjalant la foto a àn fat un meracul: la mê anime e jê lade a incjarnâsi tal cuarp di Ingevona di Telemark! La mê anime traspuartade par kilometros, come cul teletraspuartadôr di Star Trek!
O soi a fâ un rehearsal cu lis Persephone.
Elyzha mi dîs di dut par norvegjês…o pensi parcè che o fali i acuarts. Le prei di fevelâ par inglês parcè che no capìs il norvegjês e o continui a falâ i acuarts… o samei la ghitariste di un grup di improvisadôrs art-rock. Elyzha si stufe e mi mande fûr de band.
Al fâs frêt in Telemark. Ducj mi cjatin strane… no soi plui la vere Ingevona; o cognòs pocjis peraulis par bokmal e mi dismentei di metimi i asorbents pes mestruazions. Mi môf intun strani mût e o mandi a cagâ dutis lis miriadis di zovenats che mi fasin il fîl… a scuele al va malon e o prei i insegnants di fevelâ par inglês. O ziri simpri cul vocabolari di norvegjês. I pôcs Selvuçans di Telemark ju frecuenti fra la sorprese di ducj chei che o cognossevi prime. O feveli benon cun lôr par selvuçan e i norvegjês si maravein une vore. Cui sono chei li? I miei gjenitôrs? E je une che mi samee: mê mari. No sai ce dî. Scuse mame ma o ai dismenteât dut. O ai une strane forme di amnesye, mame. Papà Viking no mi visi di cuant che tu mi vevis regalât il prin orsut di peluche…
Lis amiis mi coionin…
O soi content di jessi tal cuarp di Ingevona, il plui biel cuarp dal mont: o ai la sô vôs e o fâs l’amôr cun me stesse. O soi content/contente de me gnove nature. O pensi al spirt di Ingevona che tal cuarp di Orgnan nol sa une peraule di selvuçan mal al sune benon la ghitare. Orgnan che al ven licenziât par no rivâ a decifrâ un codiç a baris sui prodots dal supermarcjât…aio di lâ li di lui/jê in Selvucis? Aio di unîmi a lui/jê? O aio di stâ a fâ l’amôr cun me stesse: autoerotisim, tant o ai il plui biel cuarp dal mont…il cuarp di Ingevona. Oh, Nekronomikon, ce grant libri di magjie!
Il timp al va indevant. Il passât e il futûr si intersechin tal cumò. O ai tante nostalgjie di cjase. O scugni tornâ in Selvucis e braçolâ Ingevona dentri tal cuarp di Orgnan… o no? Miôr cussì? Miôr vê il cuarp e la vôs di regjine?

di Checo Tam
#907

Note dal autôr:
Cheste conte e je une sorte di spin-off di RANDOM, un deliri presentât al San Simon 2002; part des contis associadis a RANDOM a son finidis su Scûr di lune e altris a son restadis fûr; l’om di buine volontât a pues divertîsi a anagramâ la formule dal Nekronomikon… no mi visi plui nancje jo il significât! Logjic che il libri Nekronomikon lu vevi cjapât in prestit di H.P. Lovecraft, un dai miei scriptores preferîts

3 coments On Nekronomikon!

  • Cu le scolarizazion di cuinte “ALIMENTÂR” che ai fate, fasint cressi pomodoros intal ort de mestre cuant i avions tornavin cjase a guere finide, o pant le sante veretât che no rivi tira fûr un bec di moscje da conte dal Checo, Pûr savint che dentri e ten di sigûr alc di interessant che il Checo ûl dinus . Le peraule ORGNAN ma la ricuardi ben; mal disè simpri il plevan a dutrine cuant a la domande ” chi è Dio” ji rispuindevi “il mecanic di …….. ” o sintivi a dî di ducj ” al comede bicicletis che al è di Diu. Lussian

    • MA no tu âs di fâti masse fastidis, Lussian, a son contis gjavadis fûr di un progjet plui lunc, e a son fatis di pueste par no capî nuie, bisugne dome butâsi tes aventuris di Orgnan cence tant pensâi parsore. 🙂

  • Jo stoi pensant a chei che si son iscrits te Liste di Contecurte cence jessi mai stâts sul sît… doman ur rivarà la mail cun lis ultimis contis publicadis e cjataran ancje chê ca: podaressin restâ un tic scaturîts 😀

Leave a Reply to Anonim Cancel reply

This site uses Akismet to reduce spam. Learn how your comment data is processed.

Site Footer