Une sentence tribolade

Il grop dai judiçs al stave jentrant ben planc inte aule, tabarossâts intai lôr gabanons neris.
Di chê altre bande, Bepo al jere za impins, prin ancjemò che la vuardie ai disès di fâlu.
– Bepo, che si alci impins! – al veve dit il judiç, cun vôs rabiose.
– O soi za pront! – Bepo nol veve pôre.
Inte aule si sintive un cisicament.
– O volarès visâus che o sin intun tribunâl. Un tribunâl seri. Stait cidins!
Disint chest, il judiç al veve cjapât il martiel di len e al veve petât un pâr di voltis sul cep.  Nancje a fâlu a pueste, il martiel si jere rot in doi, e il judiç al jere restât cul mani in man.
– Vuardie! Met a puest il martiel! A voaltris, invezit, o domandi atenzion. O stoi par lei une sentence.
Subit la stanzie si jere cuietade.
– Siôr Bepo lui al è un mestri di scuele, vere?
– Sigûr! – al veve rispuindût Bepo.
– Al è acusât di meti intal cjâf ai siei arlêfs stranis ideis che a van cuintri dal regjim. Cul riscjo che dopo chescj zovins a pensedin pardabon cul lôr cjâf. Ise vere?
– Ben, disin…
– Chest al è un fal! – Il judiç no lu lassave cjacarâ.
Di un trat, un sdrondenon al veve jemplade la stanzie. Il scjalin di len dal judiç si jere sclapât e lui al jere colât, berdeantsi inte tonie. Subit si jere dreçât impins come un seon, come che nuie al fos sucedût.
– Alore, cheste je la sentence: lui, Bepo, al vignarà sospindût da l’insegnament, fintremai che nol cambiarà lis sôs ideis. Cun di plui, al vignarà confinât intune gnove localitât, che a sarà comunicade in curt. Cussì al è stât decidût!
Il cisicament al deventave simpri plui fuart.
Il judiç al jere sudât in aghe.
– Stait cidins! – al vosave – Stait cidins!
No savint cemût puartâle fûr, al veve cjapât di gnûf il martiel in man e al veve scomençât a pestâ sul cep.
Nancje dite. Une altre volte il martiel si jere rot in doi, lassant il judiç cui voi spalancâts e cul mani in man.
– Siôr judiç – al veve dit Bepo – Jo o voi al confin, ma lui che al clamedi un bon marangon!
Eco alore che di dute la stanzie si jere alçade une gran ridade.

di Massim Furlan

#900

 

Notis sul protagonist de conte: Pre Bepo Marchet
Intal 1944, une sentence dal Ministeri pe Educazion Nazionâl a slontanave Bepo dal so paîs, viers Bobbio, in provincie di Placence, colpe dal so mût di insegnâ, ritignût masse libertari.
Bepo, al nas a Glemone, intal 1902. A dodis agns al jentre intal seminari par vignì ordenât predi intal 1925. In pôcs agns si è indotorât a Milan, in letaris e in teologjie. Framieç al fâs il servizi militâr a Fiume. Al ven ancje mandât come capelan militâr in Abissinie, vie in dilunc la ocupazion taliane.
Storic, linguist, apassionât di art, scritôr, poete. Lis sôs publicazions a àn cjapât dentri ducj i aspiets de culture furlane. A stin cjacarant di Josef Marchet, pre Bepo
Cun Felix Marchi al à fondât intal 1946 il gjornâl Patrie dal Friûl. Intal 1949 al met adun il moviment leterari Risultive, un grup di zovins scritôrs che a vevin di rinovâ la poesie in furlan, cussì di incressi e rinfuarçâ la marilenghe.
Al è stât diretôr de riviste Sot la Nape, publicade de Societât Filologjiche Furlane.
Al è muart a Udin, intal 1966.

3 comments On Une sentence tribolade

  • E nô di Contecurte no vin voie di sierâ la setemane cence une altre conte. Cheste volte o nin a svangjâ indaûr, intun vieri contecurteday, chel di Vile Manin, che si intitulave Ce vitis! O vin ancjemò di meti sù dutis lis contis e planc a planc la cumbinin. Cheste e je une conte dediade a un personaç che al fâs part dal pantheon dai furlans e che il nestri Massim Furlan al à tratât in maniere lizere e zuarine. E je saltade fûr une conte une vore biele, dute di gjoldi!

  • Pingback: Contecurte Day 2018 – Ce vitis! | Contecurte ()

  • No son judiçs che tegnin parsore di pre Bepo Marchett, ne chei di îr ne chei di vuê, grant personaç cu lis ideis claris pa so int e pa so tiere, ancie il martiel fasè riviell a che sentence. Lussian

Leave a Reply to Gelo Stellato Cancel Reply

Your email address will not be published.

This site uses Akismet to reduce spam. Learn how your comment data is processed.

Pît di pagjine dal sît