Siops

Lu veve gjenerât lui.

Lu veve gjenerât lant daûr de sô imagjin, stant atent che la someance e fos il plui pussibil perfete.

Lu veve gjenerât e cumò lu cjalave di adalt, intant che al faseve lis sôs volontâts, plen di pensîrs.

‘Sef nol veve volût lâ a messe di miezegnot.
Al jere restât a cjase di bessôl, sentât da cjâf de grande taule, a fissâ un plat vueit, dulà che al veve poiade la letare, aromai fruiade, che di cetant lu tormentave. La femine e veve cirût di tirâlu a siment, di fâi capî che nol jere cun chel grant tuart al Signôr che lis robis si saressin comedadis, ma lui nol veve intindude reson.
«’Sese, al è lui che mi à fat un tuart a mi», i veve sunsurât, e jê si jere subit segnade e scjassant il cjâf, scunide, e veve molât il vues.
«Poben, almancul ten messedadis lis tripis, e viôt che no si tachin, par cuant che o tornìn». Lu veve saludât, sburtant fûr la picinine, involuçâde intal capotut cu lis sachetis che a sglinghinavin di coculis. Une bugade di criùre si jere ficjade dentri e e veve fat svualâ vie la madonute, fate sù cui scartòs di blave.
‘Sef si sbassà e le cjalà, distirade su la man, prin di tornâ a poiâle in bande dal om che al puartave il so non e dal mus e dal bo gjavâts fûr di doi curubui. «No sai se tu varâs vonde dal nadalin di chest an, par suiâ ducj i panzits di to fi». Al disè a vôs alte, e cuasi vergognantsi di chê debolece, al corè subit li dal fûc, a voltâ il grant çoc di rôl, impiât propite ta chê sere, metint in bande la cinise. Si ben che al fos un biel len, nol jere masse grant e nol veve podût tratâlu come che si conven; al veve pôre che nol rivàs a regalâur boris e faliscjis fintremai a cjadalan. Da rest, al jere lavôr di oms, chel, e a lui i jerin vanzadis dome cuatri feminis, la plui grande sì e no in etât di marît. I mascjos, i prins doi, ju veve puartâts vie la Patrie, scambiâts cun dôs crôs che par lui no valevin nancje il fier che a pesavin, sieradis cumò intun scansel, in bande dal Gjesù Bambin che al veve intaiât cu la britule. Il tierç fi, Doardo, cuissà…
Sono vivo. Tornerò per le feste. Edoardo.
‘Sef al leiè pe milionesime volte chel cuadrelut di cjarte, cjatât te buchete in tai mês de Sierade dal ‘46. Ma lis fiestis a jerin vignudis dongje cence di lui. Il turcli al veve clamât la vuarzine, la cinise dal nadalin e jere stade çupade de tiere, la sape si jere spostade par lassâ puest al falçut. Dut un lunari al veve voltât lis pagjinis cence che si savès alc dal frut. E pûr so pari, di chê volte, di chê letare, nol veve mai mancjât di parecjâ la taule cuntun plat in plui; intune spiete che lu roseave di dentri, che lu puartave a difindisi di ducj.
Ti àn fat une baronade, une tristerie, a cuacavin lis lengatis dal paîs. Si ve po! E cuissà cui!
O pûr i è sucedût alc dopo… E ce vevial di sucedi! La vuere e je finide!
O pûr al à cjatât bonstâ… Posissà po! In Russie! In chê tiere di cence diu!
‘Sef al cjatave un parcè par ogni dì che al passave, e il timp al coreve cu la stesse velocitât e smanie che lis frutis a vevin vût in tal mangjâ i siops de zornade. E cussì e rivà la Vee dal ’47 e chel plat al restà simpri vueit.
‘Sef al sintì scampanotâ e si ricjapà….

di Rafaêl Serafin

#902

[… e va indevant su la Patrie dal Friûl di Dicembar]

[o pûr intai contignûts extra di cui che al compre Lis Contis dal Mês]

E je la Vilie di Nadâl e noaltris di Contecurte o vin voie di meti une conte di Nadâl. Une conte che e sedi propite scrite di pueste par cheste zornade. E il nestri Ostîr al à pene regalade une conte lungje a La Patrie dal Friûl, e la cjatais sul numar di Dicembar, che us invidin a cjoli e lei, stant che come simpri al è plen di robis bielis di lei par furlan. O vin vût ancje gust, par augurâ a ducj Bon Nadâl, di lassâus achì parsore mieze di cheste conte.

Buinis Fiestis di Chei di Contecurte!